Yaşar Gülər: Türkiyə öz sərhədlərindən kənarda da sülhə və sabitliyə töhfə verir
Ankara, 26 mart, AZƏRTAC
Müasir Türkiyə öz sərhədlərindən kənarda da sülhə və sabitliyə əhəmiyyətli töhfə verən dövlətdir.
AZƏRTAC xəbər verir ki, bunu Türkiyənin milli müdafiə naziri Yaşar Gülər şəhid ailələri və qazilərin iştirakı ilə keçirilən tədbirdə söyləyib.
O, Ankaranın bir çox münaqişə və böhranların həllindəki əsas roluna diqqət çəkərək deyib: “Strateji coğrafi mövqeyi, güclü ordusu və sürətlə inkişaf edən müdafiə sənayesi sayəsində Türkiyənin beynəlxalq aləmdəki mövqeləri getdikcə güclənir. Ölkəmiz beynəlxalq təhlükəsizlik və diplomatiya sahələrində əvəzolunmaz aktordur. Türkiyənin hərbi sənaye kompleksinin çatdığı səviyyə xaricdə qısqanclıqla qarşılanır. Pilotsuz uçuş aparatları, təyyarələr, helikopterlər, hərbi gəmilər, sualtı qayıqlar və türk mütəxəssislərin hazırladıqları digər məhsullar müdafiə sənayemizin yüksəldiyi səviyyəni göstərir.
Terrorizmlə mübarizə mövzusuna da toxunan Yaşar Gülər PKK terrorçularının qeyd-şərtsiz silahsızlaşdırılmasının vacibliyini vurğulayaraq deyib: “PKK terrorçuları və bu qanlı təşkilatla əlaqəli bütün cinayətkar təşkilatlar silahlarını yerə qoymalı, fəaliyyətlərini dayandırdıqlarını elan etməlidir”.
Ramin Abdullayev
AZƏRTAC-ın xüsusi müxbiri
Ankara
Bölmənin digər xəbərləri
