Yeni gen terapiyası ilə anadangəlmə eşitmə qüsurlu 5 uşaq müalicə edilib
Bakı, 12 iyun, AZƏRTAC
Çin və ABŞ tədqiqatçılarının rəhbərlik etdiyi klinik sınaqda inqilabi yeni gen terapiyası nadir genetik mutasiya ilə doğulanlar üçün yeni ümidlər yaradır.
AZƏRTAC “Associated Press” agentliyinə istinadla xəbər verir ki, alimlərin səyləri sayəsində üçyaşlı və anadangəlmə eşitmə qüsuru olan uşaq artıq “ana” və “ata” deyə səslənir və rəngləri dəqiq adlandırır. Bu azyaşlı nadir genetik mutasiya ilə doğulanlara yeni ümidlər verən Çin və ABŞ tədqiqatçılarının rəhbərlik etdiyi klinik sınaqda inqilabi yeni gen terapiyası vasitəsilə eşitmə qabiliyyəti bərpa edilən beş uşaqdan biridir.
Çinli uşağın anası deyir ki, o, keçən ilin sentyabrında, müalicədən təxminən üç həftə sonra oğlunun qapı zəngini eşitdiyini görəndə göz yaşlarına boğulub. O bildirib: “Mən şkafda gizləndim, onu çağırdım və övladım cavab verdi!”
Nüfuzlu “Nature Medicine” jurnalında dərc edilən araşdırmanın nəticələri prosedurun hər iki qulaqda ilk dəfə edildiyini göstərir. Bu, yalnız bir qulaqda müalicə ilə müqayisədə nitq qavrayışında və səslərin mənbəyini tapmaq qabiliyyətində əhəmiyyətli irəliləyişlərə səbəb olub.
“Eaton-Peabody” göz-qulaq laboratoriyalarında aparılan tədqiqatın baş müəllifi Jenq-Yi Çen bildirib ki, bu, eşitmə qabiliyyətinin bərpasında tamamilə dönüş nöqtəsidir və şirkətlər indi Bostonda klinik sınaqlar keçirirlər. Tədqiqatlar tənzimləyicinin təsdiqinə doğru irəliləyir. Alimlər hesab edirlər ki, əgər nəticələr heç bir ağırlaşma olmadan davam edərsə, üç-beş ildən sonra bu, tibbi olaraq təsdiqlənmiş bir müalicə üsulu ola bilər.
Qlobal miqyasda eşitmə qüsurunun genetik formaları olan təxminən 26 milyon insan var, bu xüsusi terapiya OTOF geninin mutasiyası ilə doğulmuş insanlara yönəldilir, yəni irsi karlıq hallarının təxminən 2-8 faizini əhatə edir.
Müalicə OTOF geninin işlək versiyasını daşıyan dəyişdirilmiş virusun daxili qulağa yeritməyi və bununla da eşitmə qabiliyyətini bərpa etməyi əhatə edir.
Bölmənin digər xəbərləri
