Yenidən aktivləşən erməni revanşistlərə cavabımız daha sərt olacaq – Politoloq
Bakı, 22 iyun, AZƏRTAC
Son günlər erməni hərbi birləşmələri həm Naxçıvanda, həm şərti sərhəddə, həm də Qarabağda atəşkəsi pozaraq təxribatlar törədirlər. Erməni silahlılarının yenidən aktivləşməsi, təbii ki, müəyyən maraqlı dairələrin sifarişi ilə həyata keçirilir. Məqsəd Azərbaycanla Ermənistan arasında mümkün sülh müqaviləsinə mane olmaq, regionda sabitlik və inkişaf tempini tormozlamaqdır.
Bu sözləri AZƏRTAC-a açıqlamasında politoloq Ramiz Alıyev söyləyib.
Onun sözlərinə görə, müəyyən maraqlı qüvvələr Azərbaycan və Ermənistan arasında sülh müqaviləsinin bağlanmasını istəmirlər, bu prosesə maneə yaradırlar: “Ermənistan tərəfinin törətdikləri təxribatlardan sonra Azərbaycan Ordusunun onlara verəcəyi cavab zərbəsi sifarişçiləri maraqlandırmır. Ermənistan hərbçiləri hökumət başçısının tapşırıqlarına əhəmiyyət vermirlər. Sanki Nikol Paşinyanı bu ölkədə saymırlar, ona hörmət etmirlər. Yaxud da N.Paşinyan özü belə bir ssenari hazırlayıb ki, kürsüdə bir söz desin, ordusu isə başqa cür hərəkət etsin. Özünün demokrat, sülhpərvər imicini yaratmaq istəyən N.Paşinyan Azərbaycan Ordusunun sarsıdıcı qisas zərbələrinin daha ağır olacağının sanki fərqində deyil”.
Azərbaycanın 44 günlük Vətən müharibəsində Ermənistanın bütün hərbi infrastrukturunu sıradan çıxardığını xatırladan politoloq deyib: “İndi Ermənistanın nə iqtisadi, nə siyasi, nə də hərbi baxımdan bizə müqavimət göstərəcək gücü qalmayıb. Ermənistan cəmiyyəti və hakimiyyəti reallıqla barışa bilmir. Onlar səhər durub Azərbaycan bayrağının başları üzərində dalğalandığını görəndə narahat olurlar. Həm narahatdırlar, həm də qorxurlar. Ona görə də, hiyləgərcəsinə, kolluqda gizlənib uzaqdan bizə silah tuşlayırlar. Ermənistandakı revanşistlər və onları maliyyələşdirənlər atəşkəsin pozulmasında maraqlıdırlar. Bununla regionda gərginliyi yenidən artırmaq istəyirlər. Biz lazım gələrsə, daha sərt müharibələrə hazırıq. Bütün dünya Azərbaycanın ərazi bütövlüyünü və qələbəsini tanıyır.
Bundan sonra baş verəcək hadisələrə görə, bütün məsuliyyət Ermənistanın siyasi hakimiyyətinin üzərinə düşür. Bəzi ölkələr qəsdən münaqişə ocaqlarını oyatmaqla revanşistlərə motivasiya verirlər. Ermənilərdən yenə də vasitə, alət kimi istifadə olunur”.
R.Alıyev bildirib ki, son vaxtlar hədəf kimi Naxçıvanın seçilməsi təsadüfi deyil: “Bilirsiniz ki, hazırda Qazaxın 7 kəndi ilə yanaşı, Naxçıvanın da bir kəndi işğaldadır. Həmin kəndlər geri qaytarılacaq. Bu gün Naxçıvanın davamlı olaraq atəşə tutulmasının kökündə məhz işğaldakı Kərki kəndi ilə bağlı narahatlıqlar dayanır. Eyni zamanda, Naxçıvanla şərti sərhədin yaxınlığında ermənilər metallurgiya zavodu inşa etmək istəyirlər. Onlar məqsədli şəkildə bizi təxribata sürükləmək istəyirlər ki, Ordumuz erməni mövqelərini darmadağın etsin, onların postlarını tutsun və zavodun yerləşdiyi ərazi Azərbaycanın ixtiyarına keçsin. Bununla da dünyaya göstərmək istəyirlər ki, bax, görürsünüz, Azərbaycan Ordusu Ermənistanın metallurgiya zavodunu ələ keçirib. Təbii ki, Azərbaycan Ordusu plan üzrə, əmrlə hərəkət edir. Amma biz uzun müddət erməni təxribatlarına yalnız cavab verməklə kifayətlənə bilmərik. Bu təxribatları birdəfəlik aradan qaldırmaq, təhlükə gələn yerləri məhv etmək hüququna, gücünə malikik. Bu da Ermənistan üçün yaxşı heç nə vəd etmir. Hazırda Ermənistanın törətdiyi təxribatlar Azərbaycan üçün kifayət qədər ciddi təhdidlər yaradır. Ermənistan Azərbaycanla münasibətlərində dönüş yaratmasa, sarsıdıcı zərbələr alacaq. Azərbaycanla şərti sərhəddə baş verə biləcək xoşagəlməz hadisələrə görə bütün məsuliyyəti İrəvan daşıyır”.
Bölmənin digər xəbərləri
