Yük avtomobillərində dərman preparatları və siqaretlər aşkarlanıb
Bakı, 23 iyun, AZƏRTAC
Yük avtomobillərində dərman preparatları və siqaretlər aşkarlanıb.
Dövlət Gömrük Komitəsinin Mətbuat və İctimaiyyətlə Əlaqələr İdarəsindən AZƏRTAC-a bildirilib ki, Qərb Ərazi Baş Gömrük İdarəsinin Əməliyyat və Təhqiqat İdarəsinə daxil olan məlumatlar əsasında iki fakt üzrə müxtəlif məhsulların qanunsuz yolla ölkə ərazisinə gətirilməsi cəhdinin qarşısı alınıb. Belə ki, İdarənin "Qırmızı Körpü" gömrük postunda Gürcüstandan gələn "Iveco" və "Mercedes Benz" markalı yük nəqliyyat vasitələri saxlanılıb, sürücüləri şifahi sorğu-sual olunublar. Sorğu-sual zamanı sürücülər idarə etdikləri nəqliyyat vasitələrində gömrük nəzarətindən gizlədilən və bəyan edilməyən hər hansı predmetin olmadığını bildiriblər.
Gömrük yoxlaması zamanı avtomobillərin gizli saxlanc yerlərində 1000 ədəd aksiz markası olmayan "Marlboro" markalı siqaret və 440 ədəd müxtəlif adda dərman preparatı aşkarlanıb.
Faktla bağlı araşdırma aparılır.
Bölmənin digər xəbərləri
