Zelenski: Odessanı qorumaq üçün əlavə müdafiə sistemlərinə ehtiyac var
Bakı, 19 iyul, AZƏRTAC
Odessanı qorumaq üçün əlavə SAMP-T və ya Patriot hava hücumundan müdafiə sistemlərinə ehtiyac var.
AZƏRTAC Klymenko Time nəşrinə istinadla xəbər verir ki, bu barədə Ukrayna Prezidenti Volodimir Zelenski bildirib.
“Bu gün iki sistem var. Biz SAMP-T sistemini alanda Fransa Prezidenti Emmanuel Makron və İtaliyanın Baş naziri Giorgia Meloni ilə danışıqlar apardım. Mükəmməl işləyirlər. Əgər bizdə əlavə sistemlər olsaydı, onlar təkcə liman infrastrukturunu deyil, Odessanın infrastrukturunu da qoruyardı”, - dövlət başçısı belə deyib.
Bundan əvvəl Prezident hərbçilərə Odessanın liman infrastrukturunun təhlükəsizliyini gücləndirməyi tapşırıb. Ukrayna Silahlı Qüvvələrinin “Cənub” operativ komandanlığı Rusiya ordusunun miqyaslı hava hücumları nəticəsində şəhərdəki sənaye müəssisəsinə və liman infrastrukturuna zərər dəydiyini açıqlayıb.
Rusiya Müdafiə Nazirliyi bildirib ki, ötən gecə Ukrayna Silahlı Qüvvələrinin Odessa vilayətindəki hərbi sənaye obyektlərinə, yanacaq infrastrukturuna və sursat anbarlarına, eləcə də Ukrayna Hərbi Hava Qüvvələrinin Kirovoqrad vilayətindəki aviabazasına yüksək dəqiqlikli silahlarla zərbə endirilib.
Bölmənin digər xəbərləri
