20 Yanvar Azərbaycanın şərəf tarixidir
Bakı, 21 yanvar (AZƏRTAC). Ümumxalq Hüzn Günündə şəhidlərin xatirəsini yad etmək üçün Şəhidlər xiyabanına gələn insanlar arasında bu qanlı hadisənin birbaşa şahidləri də vardır.
“Borçalı” cəmiyyətinin sədri Zəlimxan Məmmədli bildirmişdir ki, 20 Yanvar hadisələri milli azadlıq hərəkatının mühüm bir mərhələsidir.
Azərbaycanda azadlıq hərəkatını boğmaq üçün keçmiş sovet hakimiyyətinin Bakıya yeritdiyi nizami qoşun dəstələri şəhərin dinc sakinlərinə qarşı vəhşiliklər törədir, təcili yardım maşınlarını, yaşayış binalarını və yoldan keçənləri gülləbaran edirdilər. 20 Yanvar günü xalqın müqaviməti nizami ordu hissələrinə qarşı insanların, müəyyən mənada, öz-özünə təşkil olunmuş müdafiə sistemi idi. Tanklarla, ən müasir silahlarla silahlanmış bir ordunun qarşısına Azərbaycan xalqının əliyalın çıxması bu millətin qəhrəmanlığını, mərdliyini göstərən amildir. Buna görə də 20 Yanvar bizim şərəf tariximizdir.
Xalqların şərəf tarixlərinin yazılması üçün tarixdə daim qurbanlar verilmiş, qan tökülmüşdür. 20 Yanvar faciəsində həlak olanlar öz şəhidlikləri ilə xalqımıza müstəqillik qazandırmışlar. Onların ruhu hər zaman bizim qəlbimizdə yaşayacaqdır. Azərbaycan xalqının 21 il bu müqəddəs məkanı ziyarət etməsi şəhidlərimizin xatirəsinin həmişə qəlbimizdə yaşayacağını göstərir.
Bölmənin digər xəbərləri
