QAN YADDAŞI
20 Yanvar şəhidlərinin əziz xatirəsi Ankarada ehtiramla yad edilib VİDEO
Ankara, 20 yanvar, AZƏRTAC
Türkiyənin paytaxtı Ankara şəhərində 20 Yanvar - Ümumxalq Hüzn Gününə həsr olunmuş anma mərasimi keçirilib.
AZƏRTAC xəbər verir ki, Azərbaycanın Türkiyədəki səfirliyi, Türk Siyasət və Strateji Tədqiqatlar Fondu (TÜRPAV) və paytaxtın Keçiörən rayon bələdiyyəsinin birgə təşkil etdiyi tədbirdə yerli ictimaiyyətin nümayəndələri, elm və mədəniyyət adamları, ictimai fəallar iştirak ediblər.
Qanlı Yanvar hadisələrinin dəhşətlərini əks etdirən fotosərgi ilə tanışlıq olub.
Vətənimizin bütövlüyü, azadlığımız uğrunda canlarını fəda edən şəhidlərimizin əziz xatirəsi bir dəqiqəlik sükutla yad edilib.
Azərbaycan və Türkiyənin Dövlət himnləri səsləndirildikdən sonra 20 Yanvar faciəsinə dair film nümayiş olunub.
Tədbirin açılışında çıxış edən Azərbaycanın Türkiyədəki səfiri Rəşad Məmmədov və Ankaranın Keçiörən rayon bələdiyyəsinin sədri Turqut Altınok 20 Yanvarın ötən əsrin sonlarında dünya düzəninin dəyişməsində mühüm rol oynayan nəhəng siyasi hadisələrdən biri olduğunu qeyd etdilər.
Çıxışlarda Ulu Öndər Heydər Əliyevin 20 Yanvar hadisələrinə dair həqiqətlərin dünya ictimaiyyətinə çatdırılması, bu qanlı hadisəyə hüquqi qiymət verilməsi prosesindəki tarixi xidmətlərindən danışılıb.
Toplantının panel hissəsində çıxış edən tanınmış elm adamları İyirmi Yanvar faciəsinin səbəb və məqsədləri ətrafında fikir və düşüncələrini bölüşüblər.
Diqqətə çatdırılıb ki, Azərbaycanın dövlətçilik tarixinin həm qanlı, həm də şanlı səhifəsi olan 20 Yanvar hadisələri bütöv bir xalqın azadlıq arzularına qarşı törədilən hərbi qəsddir.
Sabir Şahtaxtı
AZƏRTAC-ın xüsusi müxbiri
Ankara