Samux, 9 avqust, Elcan Məmmədov, AZƏRTAC

Ölkəmizin hər yerində olduğu kimi, Samux rayonunda da əhalinin mədəni inkişafı, sosial vəziyyətinin yaxşılaşdırılması və ona göstərilən səhiyyə xidmətlərinin ən müasir səviyyədə olması daim diqqət mərkəzində saxlanılır. Avqustun 7-də Prezident İlham Əliyevin Samux Rayon Mərkəzi Xəstəxanasının yeni binasının və Heydər Əliyev Fondunun “Təhsilə dəstək” layihəsi çərçivəsində inşa olunan Sərkar kənd uşaq musiqi məktəbinin yeni binasının açılışlarında iştirak etməsi bunun bariz nümunəsidir.

Sərkar kənd uşaq musiqi məktəbinin direktoru Səadət Məmmədbəyova AZƏRTAC-ın bölgə müxbirinə müsahibəsində bildirib ki, 2002-ci ildən məktəb 1935-ci ildə inşa olunmuş kolxoza aid birmərtəbəli tikilidə fəaliyyət göstərib. Məktəbin binası ötən müddət ərzində köhnəlib və istifadəyə yararsız vəziyyətə düşüb.

“Məktəbin ümumi ərazisi 0,5 hektar, üçmərtəbəli korpusun sahəsi isə 2500 kvadratmetrdir. Bina 8 ballıq zəlzələyə davamlıdır. Məktəb binasında 29 dərs otağı, orkestr, xor və tibb otaqları, qarderob, kitabxana, yeməkxana və akt zalı var. Yeni binamızın açılışında Prezident İlham Əliyev şəxsən iştirak etdi. Bu, samuxlular üçün qürurverici bir hadisədir. Həm şəxsən öz adımdan, həm də məktəbin kollektivi adından Prezident İlham Əliyevə və Birinci vitse-prezident Mehriban xanım Əliyevaya sonsuz təşəkkürümü bildirirəm,” - deyə direktor qeyd edib.

Həmçinin təhsil ocağı zəruri mebel, avadanlıq və əyani vəsaitlə tam təchiz edilib. Binanın daxilində və ərazidə videomüşahidə kameraları quraşdırılıb. Həyətyanı ərazidə abadlıq və yaşıllaşdırma işləri aparılıb, müasir işıqlandırma sistemi yaradılıb.

Samuxda səhiyyə sisteminin inkişaf etdirilməsi, əhalinin müalicə və müayinəsinin ən müasir avadanlıqlarla aparılması üçün 2019-cu ildə Samux Rayon Mərkəzi Xəstəxanasının yeni binasının tikintisinə başlanıb. İnşaat işləri bu ilin avqustunda başa çatdırılıb.

Dövlətimizin başçısı avqustun 7-də Samux Rayon Mərkəzi Xəstəxanasının yeni binasının açılışında iştirak edib.

İki hektar sahədə inşa olunan xəstəxana 90 çarpayılıqdır. Tibb müəssisəsinin üçmərtəbəli binasında əhaliyə ən müasir tələblər səviyyəsində səhiyyə xidməti göstərilməsi üçün lazımi şərait yaradılıb. Belə ki, xəstəxana Yaponiya, Koreya Respublikası, İtaliya və Türkiyə istehsalı olan ən müasir avadanlıqla təchiz edilib.

Samux Rayon Mərkəzi Xəstəxanasının direktoru İlham Həsənov dövlətimizin başçısı tərəfindən rayon əhalisinə göstərilən diqqət və qayğıdan ruhlanaraq əhaliyə daha yüksək səviyyədə xidmət göstərəcəklərini diqqətə çatdırıb.

Tibb müəssisəsində cərrahiyyə, terapiya, uşaq xəstəlikləri, nevrologiya, ginekologiya, travmatologiya, LOR, infeksion xəstəliklər, şüa-diaqnostika, reanimasiya, qəbul, laboratoriya, doğuş, hemodializ, təcili tibbi yardım şöbələri fəaliyyət göstərəcək. Ərazidə əsas korpusla yanaşı, yoluxucu xəstəliklər korpusu və digər yardımçı sahələr üçün binalar inşa olunub.

“Bu xəstəxanada həkim kimi 1976-cı ildən fəaliyyət göstərirəm. Heç vaxt rayonumuzda bu cür müasir səviyyəli xəstəxana binası olmayıb. Prezident İlham Əliyevin sayəsində xəstəxanamız 15 çarpayılıq yerdən bu gün müasir avadanlıqlarla təchiz olunan 90 çarpayılıq xəstəxanaya çevrilib. Sadə müayinələrdən ötrü rayonumuzun sakinləri kənar yerlərə üz tuturdular. Bu gün müasir xəstəxana binasının açılışı səhiyyə işçiləri ilə yanaşı, bütün samuxluları da sevindirib. Yaradılan şəraitə görə Prezident İlham Əliyevə sonsuz təşəkkürümüzü bildiririk,” - deyə xəstəxananın həkimi Cavid Zöhrabov qeyd edib.

Burada yaradılan şəraitdən görünür ki, vətəndaşların hərtərəfli və keyfiyyətli tibbi xidmətlə təmin edilmələri, onların müalicə və müayinə işinin yüksək səviyyədə təşkili, gələcəyimiz olan uşaqların sağlam yetişmələri istiqamətində icra edilən layihələr dövlətimizin başçısının daim diqqətində və nəzarətindədir.