28 May – Müstəqillik Günü Kolumbiyada təntənəli şəkildə qeyd olunub VİDEO
Bakı, 5 iyun, AZƏRTAC
Kolumbiyada 28 May – Müstəqillik Günü və iki ölkə arasında diplomatik münasibətlərin qurulmasının 30 illiyi münasibətilə rəsmi qəbul keçirilib.
Azərbaycanın Meksikadakı səfirliyindən AZƏRTAC-a bildiriblər ki, tədbirdə Kolumbiyanın dövlət və hökumət nümayəndələri, Konqresin üzvləri, bu ölkədə akkreditə olunmuş diplomatik korpusun, işgüzar dairələrin və ali təhsil müəssisələrinin təmsilçiləri, Kolumbiyada yaşayan soydaşlarımız iştirak ediblər.
Tədbirdə çıxış edən səfir Məmməd Talıbov Şərqdə ilk demokratik, hüquqi və dünyəvi respublika olan Azərbaycan Xalq Cümhuriyyətinin yaranmasının 106-cı ildönümünün suverenliyimizin tam bərpasından sonra ilk dəfə bütün ölkə ərazisində keçirilməsinin tarixi əhəmiyyətindən bəhs edib. Diplomat ölkəmizin son illərdə keçdiyi uğurlu inkişaf yoluna nəzər salıb, işğaldan azad edilmiş ərazilərdə həyata keçirilən genişmiqyaslı bərpa-quruculuq işlərindən və Azərbaycanın sülh gündəliyindən danışıb. Çıxışda Azərbaycanın qarşılaşdığı mina terroru və onun ağır nəticələrindən söz açılıb, ölkəmizin minatəmizləmə fəaliyyətinin beynəlxalq ictimaiyyət tərəfindən dəstəklənməsinin vacibliyi vurğulanıb.
Səfir, həmçinin dünya miqyaslı tədbirlərə və yarışlara uğurla ev sahibliyi edən Azərbaycanın bu il COP29-a hazırlaşması, yaşıl enerjinin istehsalı və nəqlinin enerji siyasətimizin prioritetlərindən olması barədə ətraflı məlumat verib. Kolumbiya ilə son dövrlərdə əməkdaşlıq əlaqələrinin inkişafında müşahidə olunan dinamikanın məmnunluq doğurduğu, bu il iki dost ölkə arasında diplomatik münasibətlərin qurulmasının 30 illiyinin qeyd edildiyi, Azərbaycanın digər sahələrdə olduğu kimi, iqlim dəyişikliyi və enerji keçidi məsələləri üzrə qarşılıqlı faydalı əməkdaşlığı daha da genişləndirməyə hazır olduğu diqqətə çatdırılıb.
Tədbirdə Kolumbiya Xarici İşlər Nazirliyinin Kabinet rəhbəri Xuan Paes çıxış edərək ölkəsinin Hökuməti adından Azərbaycan xalqına təbriklərini və ən xoş arzularını çatdırıb. X.Paes ikitərəfli gündəlikdə yer alan məsələlərin həllini tapması istiqamətində atılan addımlara toxunub, Azərbaycanla əməkdaşlığın daha da inkişaf etdirilməsində maraqlı olduqlarını vurğulayıb. Kolumbiyalı diplomat Azərbaycanın dünyanın ən böyük və nüfuzlu tədbirlərindən biri olan COP29-a ev sahibliyi etməsini mühüm nailiyyət kimi qiymətləndirib və ölkəsi üçün sözügedən tədbirdə ən yüksək səviyyədə təmsil olunmağın xüsusi maraq kəsb etdiyini diqqətə çatdırıb.
Kolumbiya Nümayəndələr Palatasının Kolumbiya-Azərbaycan dostluq qrupunun üzvü Pedro Suares çıxışında iki ölkə arasında parlamentlərarası əlaqələrin uğurla inkişaf etdiyini bildirib, 28 May – Müstəqillik Günü münasibətilə səmimi təbriklərini çatdıraraq, bu barədə Konqres tərəfindən qəbul edilmiş bəyanatın mətnini səfir M.Talıbova təqdim edib.
Tədbirin gedişində səfir M.Talıbov Kolumbiya Senatı tərəfindən “Böyük Komandan dərəcəsində demokratiya üzrə şərəf ordeni” ilə təltif olunub. Senatın 2-ci Komitəsinin baş katibi Dieqo Qonsales təltif edilmə haqqında qətnamənin mətnini oxuyaraq, bu qərarın Azərbaycanla mövcud olan dostluq münasibətlərinin təcəssümü, eləcə də ikitərəfli və çoxtərəfli formatda əməkdaşlıq əlaqələrinin inkişafına səfirliyin verdiyi töhfənin və səfir M.Talıbovun Latın Amerikası ölkələrində diplomatik fəaliyyətinin tanınması kimi qəbul edildiyini diqqətə çatdırıb.
Qəbul zamanı COP29 və ölkəmizin turizm imkanları barədə videoçarxlar nümayiş etdirilib.
Bölmənin digər xəbərləri
