® Afrikada ilk Azərbaycan-Efiopiya biznes-forumu Əddis-Əbəbədə
Bu gün Efiopiyanın paytaxtı Əddis-Əbəbədə tarixi biznes hadisəsi baş verib. Afrika qitəsində ilk dəfə olaraq Azərbaycan iş adamlarının iştirakı ilə birinci Efiopiya-Azərbaycan biznes-forumu keçirilib. 100-dən çox iştirakçının qatıldığı forum AFAZ-ın (Africa-Azerbaijan Cooperation) təşkilatçılığı və Azərbaycan Respublikasının Efiopiyadakı səfirliyinin dəstəyi ilə reallaşıb.
Tədbir yalnız bir görüş deyildi - bu, Azərbaycan və Efiopiya arasında iqtisadi əməkdaşlığın yeni səhifəsinin açılması, uzunmüddətli ticarət və investisiya körpülərinin inşası istiqamətində atılan mühüm addım idi. Forum Azərbaycan biznesinin Afrika bazarına inteqrasiyası üçün real imkanlar yaratdı, həmçinin iki ölkənin sahibkarları arasında birbaşa dialoqa start verdi. Forumda müxtəlif sahələrdə fəaliyyət göstərən Azərbaycan şirkətləri iştirak etdi:
• AFAZ – Africa–Azerbaijan Cooperation
• Friends Coffee
• Baku Rifah Residence (tikinti)
• AZARSERVICE (tikinti)
• H2A Trading and Advisory
• 166 Global – Logistics and Transport
• Azərbaycan Tikinti Materialları İstehsalçıları Assosiasiyası (CMMA)
• Herbaflora – küncüt və qarazirə alıcısı
• İsmixanlı – meyvə və tərəvəz ixracatçısı
Şirkətlər qida və kənd təsərrüfatı, tikinti, logistika, ticarət, ixrac-idxal, sənaye materialları və digər sahələr üzrə təmsil olunub. Bu isə forumun çoxşaxəli - həm kənd təsərrüfatı, həm sənaye, həm logistika, həm ticarət sahələrinə toxunan formatda keçirildiyini göstərir. Forumun açılış mərasimində aşağıdakı şəxslər çıxış edib:
• Azərbaycan Respublikasının Efiopiyadakı səfiri Ruslan Nəsibov
• Efiopiya Xarici İşlər Nazirliyi — Biznes Diplomatiyası üzrə baş direktor səfir Yohannes Fanta
• Efiopiya Ticarət və Sahəvi Assosiasiyalar Palatasının vitse-prezidenti Sebsib Abafira Abajobir
• Əddis-Əbəbə Ticarət və Sahəvi Assosiasiyalar Palatasının Baş katibi Meseret Molla Kassahun
Sonra AFAZ-ın təsisçisi Dr.Rəna Qəfərova forumun məqsədləri, Afrika-Azərbaycan əməkdaşlığının perspektivləri və konkret investisiya - ticarət imkanları barədə geniş təqdimatla çıxış edib. Forum çərçivəsində:
• Efiopiya İnvestisiya Komissiyası (EIC) ölkənin investisiya mühiti, imkanları və investisiya sahələri barədə geniş təqdimat edib.
• Yerli sahibkarları təmsil edən Efiopiya Qadın Ticarət Assosiasiyası forumda iştirak edərək, qadın sahibkarlığı və investisiya imkanları mövzusunda çıxış edib.
• Azərbaycan və Efiopiya tərəfləri arasında özəl sektora aid 3 anlaşma memorandumuna (MoU) imza atılıb.
• Forum çərçivəsində həm B2G (Business-to-Government), həm B2B (Business-to-Business) danışıqlar aparılıb. Bu, konkret layihələr və investisiya planları üzərində dialoqun başlanğıcı olub. Görüşlər zamanı kənd təsərrüfatı, logistika, tikinti materialları, ixracat–idxalat, ticarət, sənaye parkları, qida və emal sektorları üzrə əməkdaşlıq imkanları müzakirə edilib.
Efiopiya–Azərbaycan biznes-forumu iki ölkə arasında iqtisadi münasibətlərin genişlənməsi üçün möhkəm zəmin yaradıb. Forum göstərdi ki, Azərbaycan şirkətləri Afrika bazarında rəqabətə davamlıdır və əməkdaşlıq üçün real imkanlara malikdir. Bu təşəbbüs gələcəkdə bir sıra investisiya layihələrinin, ixrac-idxal əməliyyatlarının, yeni əməkdaşlıq formatlarının yaranmasına təkan verəcək.
Forumun uğuru və iştirakçıların sayı - həm dövlət, həm özəl sektor, həm diplomatik korpus, həm sahibkarlar - bu təşəbbüsün strateji əhəmiyyətini bir daha sübut edib.
Bölmənin digər xəbərləri
