"Qəbələ" klubu Türkiyədə üç yoxlama oyunu keçirəcək
Bakı, 10 iyul, AZƏRTAC
"Qəbələ” futbol klubu 2023-2024-cü il mövsümünün hazırlığını davam etdirmək üçün Türkiyəyə yollanır.
AZƏRTAC kluba istinadla xəbər verir ki, “qırmızı-qaralar” toplanışın ikinci mərhələsini qardaş ölkədə gerçəkləşdirəcək. Komanda Boluda məskunlaşacaq. Burada üç yoxlama görüşü təşkil olunacaq. Qarşılaşmalar ayın 12-də, 15-də və 19-da baş tutacaq. İlk iki qarşılaşmada komandamız Moldovanın "Sukleya" və Rusiyanın "Orenburq" klubları ilə üz-üzə gələcək. Sonuncu rəqib yaxın günlərdə dəqiqləşəcək.
“Qəbələ” iyulun 20-də Vətənə qayıdacaq və UEFA Konfrans Liqasının ikinci təsnifat mərhələsinin “Omoniya” (Kipr) ilə görüşlərinin hazırlığını ölkəmizdə yekunlaşdıracaq.
Xatırladaq ki, “qırmızı-qaralar” iyunun 24-də Qəbələdə bir araya gələrək hazırlığın ilk mərhələsini doğma stadionda gerçəkləşdirib.
Bölmənin digər xəbərləri
