ABŞ Konqresində Azərbaycan icması fəalları üçün təlim seminarı keçirilmişdir
Vaşinqton, 26 mart (AZƏRTAC). Martın 25-də ABŞ Azərbaycanlıları Şəbəkəsi (USAN) Amerika Konqresində növbəti seminar təşkil etmişdir.
İcma fəalları və Vaşiqnton universitetlərində təhsil alan azərbaycanlı tələbələr üçün nəzərdə tutulmuş tədbirdə ABŞ-da yaşayan Azərbaycan mənşəli seçicilərin Konqreslə iş qurması, diasporumuzun gündəliyində duran prioritet məsələlər, Ermənistan-Azərbaycan Dağlıq Qarabağ münaqişəsində hazırkı vəziyyət, münaqişə ilə bağlı erməni tərəfinin mütəmadi şəkildə gətirdiyi təhrif edilmiş dəlillərə cavab və digər mövzlar üzrə tövsiyələr verilmiş, təlim keçirilmişdir.
USAN-in icraçı direkotru Adil Bağırov diqqətə çatdırmışdır ki, bu tipli təlim seminarlar keçiriləndən bəri Vaşqintonda Qarabağa dair aparılan müzakirələr və toplantılarda Azərbaycan icmasının üzvləri erməni təbliğatçıları və lobbiçilərinə daha tutarlı cavab verirlər. Belə ki, bu ilin fevral ayında ABŞ paytaxtının bir sıra universitetilərində və təhlil mərkəzlərində Cənubi Qafqazla bağlı tədbirlərdə ölkənin erməni icması Qarabağ bölgəsinin Azərbaycana məxsusluğu, burada Azərbaycan mənşəli əhalinin mövcudluğu və Azərbaycan xalqının tarixinə dair cəfəng iddialar irəli sürərkən amerika azərbaycanlılarının müvafiq arqumentləri ilə rastlaşmışdılar.
Seminardakı müzakirələrdə Azərbaycan Milli Məclisinin deputatları- Azərbaycan Demokratik İslahatlar Partiyasının sədri Asim Mollazadə, politoloq Rasim Musabəyov, “İrəli” İctimai Birliyinin sədri Ceyhun Osmanlı çıxış edərək icma üzvlərinin Dağlıq Qarabağ üzrə aparılan danışıqlarda Azərbaycan hökumətinin mövqeyi, respublikamızın hərbi qüdrəti, ABŞ-Azərbaycan münasibətləri də daxil olmaqla xarici siyasətin əsas istiqamətlərinə dair çoxsaylı suallarını cavablandırmışlar.
A.Mollazadə vurğulamışdır ki, ABŞ-Azərbaycan strateji tərəfdaşlığının kökündə, birinci növbədə, ümumi dəyərlər durur. Azərbaycan hələ 1918-ci ildə müsəlman Şərqində qurduğu ilk demokratik cümhuriyyətlə dünyəvi və mütərəqqi baxışları, həyata keçirdiyi islahatlar, o cümlədən mədəniyyət və təhsil sahəsində gördüyü işlərlə bütün bölgəyə nümunə idi. Müstəqilliyimizi bərpa etdikdən sonar biz bu tarixi xətti yenə də davam etdiririk. Bu gün Azərbaycanın qarşısında duran məqsədlər qara qızılı əqli qızıla çevirmək, mədəni və elmi inkişafı ilə dünyaya tanınmaq, tərəfdaşları ilə birlikdə İpək Yolu strategiyasını inkişaf etdirərək bölgədə sülh və rifaha nail olmaqdır. Asim Mollazadə demişdir: “Beynəlxalq terrora qarşı mübarizədə tək silah hesabına qalib gəlmək olmaz. Burada yeni ideyalar, yeni modellər də rol oynamalıdır. Azərbaycanın uğuru bütün Yaxın Şərqə nümunə kimi orada yaşayan gənclərə seçim imkanının olduğunu nümayiş etdirir. ABŞ Azərbaycan modelinin müvəffəqiyyətində maraqlıdır.”
Rasim Musabəyov Azərbaycanın ABŞ üçün strateji əhəmiyyətinə toxunmuşdur. Onun sözlərinə görə, Cənubi Qafqaz kimi mürəkkəb bölgədə Azərbaycanın təhdidlərdən qorunmasında ABŞ maraqlıdır. Bölgə resurslarının əksəriyyətinin məhz bizim ölkədə cəmləşdiyini bildirən politoloq hesab edir ki, ABŞ, Rusiya, Avropa və digərləri Cənubi Qafqazda hər hansı planlarının uğuru üçün bu gün Azərbaycanla hesablaşmalı, onun maraqlarının təmin edilməsinə nail olmalıdırlar. Bu isə, ilk növbədə. Ermənistan-Azərbaycan Dağlıq Qarabağ münaiqşəsinin tezliklə, beynəlxalq hüquq normalarına əsasən həllini nəzərdə tutur.
Ceyhun Osmanlı da çıxışında Cənubi Qafqaz bölgəsinin geosiyasi reallıqlarından danışmışdır. O, Obama hakimiyyəti dövründə ABŞ-Azərbaycan münasibətlərində dinamika azlığından gileylənərək bildirmişdir ki, ABŞ prezidenti bəyanatlarında həmişə ədalətdən söhbət açsa da, Vaşinqton Avropada ən böyük humanitar böhran- Azərbaycan əhalisinin hər 9 nəfərindən birinin qaçqın və məcburi köçkün olduğundan, suveren dövlətimizin ərazisinin böyük bir hissəsinin işğal altında olmasından, demək olar ki, danışmır. ABŞ və Azərbaycan arasında münasibətlər ədalətli və etibarlı yanaşmaya söykənməlidir.
Seminarın sonunda USAN direktorlar şurasının üzvü Bədri Məmmədli çıxış edərək Dağlıq Qarabağ məsələsi üzrə ABŞ-da aparılan ictimai müzakirələrlə bağlı fikirlərini və tövsiyələrini bölüşmüşdür.
Şəfəq Akifqızı
AZƏRTAC-ın xüsusi müxbiri
Vaşinqton
######
Bölmənin digər xəbərləri
