“Abşeronneft” NQÇİ-nin mədən əraziləri simasını dəyişir
Bakı, 23 dekabr (AZƏRTAC). “Ekol Mühəndislik Xidmətləri” Qapalı Səhmdar Cəmiyyəti (QSC) “Azneft” İstehsalat Birliyinin “Abşeronneft” NQÇİ-nin mədən ərazilərində çirklənmiş torpaqların rekultivasiyası və bioremediasiyası layihəsini uğurla davam etdirir.
QSC-dən AZƏRTAC-a bildirmişlər ki, ötən ay qurum layihənin ikinci mərhələsinin icrasına başlamışdır. Bu mərhələdə “Abşeronneft” NQÇİ-nin 7 hektaradək mədən ərazisində çirklənmiş torpaqların rekultivasiyası və neft şlamının ərazidən çıxarılaraq bioremediasiya olunması nəzərdə tutulmuşdur. İcra müddətində 18,6 min kubmetr neft şlamının çıxarıldığı əraziyə 11 min 163 kubmetr ştib, 15 min 842 kubmetr torpaq daşınaraq yayılmışdır. Sahədə 4 min 500 Eldar şamı, 4 min 500 zeytun ağacı əkilmişdir. Nəzərdə tutulmuş işlər dekabrın 23-də müvəffəqiyyətlə başa çatdırılmışdır.
“Abşeronneft” NQÇİ-nin yaşayış massivinin yaxınlığında yerləşən bu ərazi QSC-nin həyata keçirdiyi tədbirlər nəticəsində simasını tamamilə dəyişmişdir. Bu layihənin icrası eyni zamanda, Pirallahı qəsəbəsinin ekoloji vəziyyətinin yaxşılaşdırılmasına və ətrafda yaşayan əhalinin sağlamlığının mühafizəsinə müsbət təsirini göstərəcəkdir.
QSC “Abşeronneft” NQÇİ-nin mədən ərazisində çirklənmiş torpaqların bioremediasiyası işlərini davam etdirir.
Bölmənin digər xəbərləri
