AĞCABƏDİLİLƏR ERMƏNİ FAŞİSTLƏRİNİN CƏZASIZ QALMAYACAĞINA İNANIRLAR
Ağcabədi, 31 mart (AZƏRTAC). YAP Ağcabədi rayon təşkilatı
Gənclər və İdman İdarəsi Maraqlar üzrə Yaradıcı Gənclər Klubu ilə
birgə “31 mart - Azərbaycanlıların soyqırımı günüdür” adlı tədbir
keçirmişdir.
İştirakçılar soyqırımına aid sərgiyə baxmış, soyqırımı qurbanlarının xatirəsini bir dəqiqəlik sükutla yad etmişlər.
YAP rayon təşkilatının sədri Arif Quliyev, Maraqlar üzrə Yaradıcı Gənclər Klubunun sədri Məshəti Musa və başqaları çıxış edərək ermənilərin XX əsrdə “Dənizdən-dənizə böyük Ermənistan” yaratmaq məqsədi ilə Azərbaycan türklərinə qarşı keçirdikləri soyqırımı siyasətindən, törətdikləri terror aktlarından danışmışlar. Natiqlər azərbaycanlılara qarşı yüz illər boyu davam edən soyqırımı və deportasiya siyasətinin mahiyyəti və tarixi köklərini ətraflı təhlil etmiş, ermənilərin bu gün də davam etdirdikləri işğalçılıq siyasətini qətiyyətlə pisləmişlər. Xüsusi vurğulanmışdır ki, erməni faşistləri cəzasız qalmayacaqlar.
Çıxışlarda xalqımızın məruz qaldığı faciələrin dünya ictimaiyyətinə çatdırılması və bu hadisələrə siyasi-hüquqi qiymət verilməsində ümummilli lider Heydər Əliyevin xidmətlərindən danışılmış, hazırda bu siyasi xəttin Prezident İlham Əliyev tərəfindən uğurla davam etdirildiyi vurğulanmışdır.
İştirakçılara “Erməni vandalizminə yox deyək” layihəsi əsasında hazırlanmış buklet paylanmışdır.
Həmin gün Qarabağ Muğam Mərkəzində 31 mart - Azərbaycanlıların soyqırımı günü ilə bağlı mədəniyyət və turizm şöbəsinin təşəbbüsü ilə tədbir keçirilmişdir.
Bölmənin digər xəbərləri
