QAN YADDAŞI
“AKKORD”UN NÜMAYƏNDƏLƏRİ VƏ XOCALI MƏKTƏBLİLƏRİ SOYQIRIMI QURBANLARININ XATİRƏSİNİ YAD ETMİŞLƏR
Bakı, 1 aprel (AZƏRTAC). “Akkord” Şirkətlər Qrupunun ictimaiyyətlə əlaqələr departamentindən bildirmişlər ki, Azərbaycanlıların soyqırımı gününün 92-ci ildönümü ilə bağlı martın 31-də qurumun nümayəndələri Pirşağı qəsəbəsində yerləşən 2 nömrəli Xocalı məktəbinin müəllim və şagirdləri ilə birlikdə Quba şəhərindəki qanlı soyqırımı qurbanlarının kütləvi məzarlığını ziyarət etmişlər.
Şirkətin təşəbbüsü və təşkilatçılığı ilə keçirilən tədbirin iştirakçıları bu soyqırımı ilə bağlı tarixçilərin məruzələrini də dinləmişlər. Tarixçilər məktəblilərə “böyük Ermənistan” yaratmaq xülyasından ruhlanan erməni qəsbkarlarının 1905-1907-ci illərdə azərbaycanlılara qarşı genişmiqyaslı qanlı aksiyalar həyata keçirdiklərindən, 1918-ci ildə Bakı, Şamaxı, Qarabağ, Zəngəzur, Naxçıvan, Lənkəran və başqa bölgələrdə olduğu kimi, Qubada da xüsusi qəddarlıqla qırğınlar törətmələrindən danışmışlar. Bildirilmişdir ki, aşkar edilən məzarlıqla bağlı elmi araşdırmalar davam etdirilir və yaxın müddətdə Heydər Əliyev Fondunun dəstəyi ilə burada soyqırımı memorial kompleksinin tikintisinə başlanacaqdır.
######