ALİMLƏR VƏ SƏNAYEÇİLƏR SUMQAYIT KİMYASININ XXI ƏSR ÜÇÜN PERSPEKTİVLƏRİNİ MÜƏYYƏN EDİRLƏR
Şəhər İcra Hakimiyyətinin təşəbbüsü ilə keçirilən konfrans Azərbaycan Prezidenti İlham Əliyevin noyabrın 17-də respublika Nazirlər Kabinetindəki çıxışında irəli sürdüyü vəzifələrin həllinə həsr edilmişdir.
Konfrans iştirakçıları zəmanəmizin görkəmli dövlət və siyasi xadimi, Azərbaycan xalqının ümummilli lideri, ölkəyə rəhbərlik etdiyi 34 il ərzində sənayenin inkişafı üçün çox iş görmüş, Sumqayıta və sumqayıtlılara böyük qayğı göstərmiş Heydər Əliyevin nurlu xatirəsini bir dəqiqəlik sükutla andılar.
Konfransın işində respublikanın aparıcı elmi tədqiqat institutlarının alimləri, iri kimya və neft kimyası müəssisələrinin rəhbərləri, mütəxəssislər, təcrübəli mühəndis-texniki işçilər iştirak etmişlər.
Çıxış edənlər Heydər Əliyevin respublikada fundamental kimyanın təşəkkülü və kimya sənayesinin inkişafı üçün şərait yaradılmasında rolunu xüsusi vurğulamışlar. Qeyd olunmuşdur ki, məhz onun qətiyyəti və uzaqgörənliyi sayəsində 2001-ci ildə “Etilen-polietilen” zavodunda buxar-generator qurğusunun yaradılması kimi iri layihələr həyata keçirilmişdir. Əslində, müstəqil İES olan buxar-generator qurğusunun istifadəyə verilməsi “Azərikimya” Dövlət Şirkətinin bir çox vaxtı çatmış problemlərini həll etməyə imkan vermişdir.
Ayrı-ayrı qurğularda “kiçik kimya” müəssisələri yaradılması, nou-hau nəzərə alınmaqla texnoloji proseslərin modernləşdirilməsi, dünya bazarlarında tələbat duyulan məhsulların istehsalının təşkili kimi bir sıra təkliflər irəli sürülmüşdür.
Sumqayıt İcra Hakimiyyətinin başçısı Vaqif Əliyev fasilə zamanı AZƏRTAC-ın müxbiri ilə söhbətində bildirmişdir ki, tədbirdən məqsəd şəhərin kimya obyektlərinin dirçəldilməsində maraqlı olan bütün tərəflərin səylərini birləşdirmək, konkret istiqamətləri tapıb müəyyənləşdirmək, elmi monitorinq keçirmək və real perspektivləri üzə çıxarmaqdır.
O demişdir ki, zənnimcə, Sumqayıtın böyük elmi və sənaye potensialını işə salmaq və sənayeçilərin səylərini səfərbər etməklə işləməyən kimya müəssisələrinin tezliklə yenidən fəaliyyət göstərməsini təmin etmək, bərpa proseslərini sürətləndirmək mümkündür. Bu, sosial proqramı, ilk növbədə, şəhərin başlıca problemlərindən olan məşğulluq məsələsini uğurla həll etməyə imkan verəcəkdir. İşsizlərin və məcburi məzuniyyətə gedənlərin çoxu məhz “Azərikimya” müəssisələrinin fəhlə və qulluqçularıdır. Konfrans əyani surətdə göstərdi ki, sumqayıtlılar Azərbaycan Prezidenti İlham Əliyevin “Azərbaycan Respublikasının sosial-iqtisadi inkişafının sürətləndirilməsi tədbirləri haqqında” Fərmanının operativ yerinə yetirilməsi üçün bütün tədbirləri görməlidirlər və görəcəklər.
Elmi-praktik konfrans müasir elektron metodlarından istifadə olunmaqla işgüzar və konstruktiv şəraitdə keçmişdir.
İşçi qrupa çıxışları təhlil etmək, təklifləri nəzərdən keçirmək, müvafiq qətnamə qəbul etmək tapşırılmışdır. Ayda bir dəfə toplanacaq mobil işgüzar komissiya bu proqramın həyata keçirilməsinə nəzarət etməyə imkan verəcəkdir.
Mədəniyyət sarayının foyesində xalqımızın lideri, Prezident Heydər Əliyevin müxtəlif illərdə Sumqayıta gəlişini işıqlandıran fotosərgi təşkil olunmuşdu.
Konfransın işində Azərbaycan Milli Elmlər Akademiyasının prezidenti Mahmud Kərimov, Nazirlər Kabinetinin məsul işçiləri iştirak edirdilər.
Bölmənin digər xəbərləri
