Almaniya İsraildəki vətəndaşlarının daha bir qrupunu təxliyə edib
Berlin, 20 iyun, AZƏRTAC
Almaniya hökuməti İsraildə qalmış vətəndaşlarının bir qrupunu təxliyə edib.
AZƏRTAC “Spiegel” qəzetinə istinadla xəbər verir ki, İsrail ilə aparılan intensiv danışıqlardan sonra Bundesverə məxsus iki hərbi təyyarə 70-dək vətəndaşı ölkəyə gətirib. Təxliyə əməliyyatı gərgin təhlükəsizlik vəziyyəti ilə əlaqədar gizli saxlanılıb.
İsrail ilə İran arasında müharibə başlayandan sonra hələ də yüzlərlə Almaniya vətəndaşı İsraildə qalıb. İlk olaraq, Almaniya hökuməti onlara quru yolu ilə İordaniyaya getməyi tövsiyə etmişdi. Xarici İşlər Nazirliyinin təşkil etdiyi iki çarter reysi 345 alman vətəndaşını böhran zonasından çıxara bilib.
Xarici İşlər Nazirliyi bütün alman vətəndaşlarını adlarını onlayn böhran qeydiyyat siyahısında qeyd etməyə çağırıb. Hazırda bu siyahıda təxminən 4 min nəfər qeydiyyatdadır. İranda isə bu rəqəm təxminən min nəfər təşkil edir. Gərgin vəziyyətlə əlaqədar münaqişə tərəfləri ilə qonşu ölkələr üzərindən təmas etmək olduqca çətindir.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
