ALMANİYANIN RUR UNİVERSİTETİNDƏ AZƏRBAYCAN DİLİ TƏDRİS OLUNUR
Xarici Ölkələrdə Yaşayan Azərbaycanlılarla İş üzrə Dövlət Komitəsindən AZƏRTAC-a bildirmişlər ki, Berlin şəhərində fəaliyyət göstərən Nizami Gəncəvi adına Mədəniyyət İnstitutunda açılmış alman və Azərbaycan dili kursları ilə yanaşı, Almaniyanın Rur Universitetində də ana dilimiz tədris olunmağa başlamışdır. Kurslar həftədə bir dəfə iki saat keçirilir. Tədris ilinin birinci semestri Almaniya-Azərbaycan Akademik Birliyinin sədri Mərdan Ağayev almanlara və digər xarici tələbələrə Azərbaycan dilinin qrammatikasını və danışıq dilini öyrədir.
Soydaşlarımız Azərbaycan həqiqətlərini alman ictimaiyyətinə çatdırmaq üçün də müxtəlif tədbirlər həyata keçirirlər. 2004-cü il yanvarın 15-də Almaniya vaxtı ilə saat 21.00-da Boxumun yerli 98.5 FM radio dalğasında Almaniya - Azərbaycan Akademik Birliyinin növbəti radio verilişi səsləndiriləcək. Bu dəfəki proqramda ölkəmizin Almaniyadakı diasporunun və Birliyin fəal üzvləri Xəzərin enerji ehtiyatları ilə bağlı yerli əhaliyə məlumat verəcək, dinləyicilərin suallarını cavablandıracaqlar.
Bölmənin digər xəbərləri
