SİYASƏT
AMERİKA YƏHUDİ KOMİTƏSİNİN İCRAÇI DİREKTORU BAKIYA GƏLƏCƏK
AZƏRTAC xəbər verir ki, avqustun 13-də Amerika Yəhudi Komitəsinin icraçı direktoru Devid Allan Harrisin rəhbərliyi ilə nümayəndə heyəti Azərbaycana gələcəkdir.
Nümayəndə heyətinə ABŞ və Kanadada yaşayan Qafqaz yəhudilərinin Mədəniyyət mərkəzinin rəhbəri Yakov Abramov və Amerika Yəhudi Komitəsinin keçmiş Sovet İttifaqı respublikaları üzrə departamentinin direktoru Samuel Kliger daxildirlər.
Xarici Ölkələrdə Yaşayan Azərbaycanlılarla İş üzrə Dövlət Komitəsindən bildirmişlər ki, üçgünlük səfərin məqsədi Azərbaycanla, eləcə də ölkəmizdəki yəhudi icması ilə tanışlıq, ikitərəfli əlaqələrin genişləndirilməsi barədə fikir mübadiləsi aparmaqdır.
1906-cı ildə yaradılmış Amerika Yəhudi Komitəsi ABŞ-dakı yəhudi cəmiyyətlərini birləşdirən, onların fəaliyyətini əlaqələndirən qurumdur.