Amil Aman: Laçında kino istehsalı üçün olduqca əlverişli şərait mövcuddur
Laçın, 29 noyabr, Leyla Muradzadə, AZƏRTAC
Biz “Hoçazfilm” Kinostudiyası olaraq, kino sahəsinə dair bütün infrastruktur layihələrimizi uğurla həyata keçirmişik.
Bu sözləri AZƏRTAC-a müsahibəsində “Hoçazfilm” Kinostudiyasının direktoru Amil Aman deyib. O qeyd edib ki, Laçın şəhərində kino istehsalı üçün olduqca əlverişli şərait mövcuddur.
“Mədəniyyət Nazirliyi ilə birgə layihələrimiz olub. Son layihəmiz “Qarabağ qubernatoru” adlı tammetrajlı bədii-sənədli filmdir. Bundan əlavə, ötən il ərzində uşaqlar üçün də bir film istehsal etmişik. Beləliklə, bir il ərzində biri qısametrajlı bədii, digəri tammetrajlı bədii-sənədli olmaqla iki film ərsəyə gəlib.
Həmçinin son dövrlərdə Azərbaycanda kino sahəsində tətbiq olunan güzəştlər, maliyyə ayrılması ilə bağlı mümkün dəyişikliklər olmaqla bugünkü dəyirmi masada bir sıra vacib məsələlər müzakirə olunub. Ümid edirəm ki, bütün bu məsələlər kino sahəsində fəaliyyət göstərən şirkətlərin daha əlverişli və səmərəli şəraitdə çalışmasına təkan verəcək. Bu isə bizə, yaradıcı kollektiv olaraq, tamaşaçılar qarşısına daha keyfiyyətli və peşəkar filmlərlə çıxmağa imkan yaradacaq”, - deyə Amil Aman vurğulayıb.
Bölmənin digər xəbərləri
