Aqrar sığorta eksperti olmaq istəyən namizədlər üçün növbəti təlimlər keçirilib
Bakı, 12 avqust, AZƏRTAC
Azərbaycanda dövlət dəstəyi ilə təqdim olunan aqrar sığorta mexanizmi çərçivəsində sığorta hadisələrinin daha operativ və keyfiyyətli araşdırılması, fermerlərə sığorta ödənişlərinin daha sürətli həyata keçirilməsi istiqamətində tədbirlər davam etdirilir.
Aqrar Sığorta Fondundan AZƏRTAC-a bildirilib ki, bu məqsədlə aqrar sığorta eksperti olmaq istəyən namizədlər üçün növbəti təlimlər keçirilib. Təlimlərdə müxtəlif hadisələrin əkin sahələrinə vurduğu zərərlər, məhsuldarlığa təsirin araşdırılması prosesi, zərərlərin hesablanması və digər məsələlər barədə geniş məlumat verilib.
Aqrar Sığorta Fondunda və Şamaxı rayonunun meyvə bağlarında keçirilən təlimlərdə ölkənin müxtəlif regionlarından olan 28 namizəd iştirak edib.
Qeyd olunub ki, aqrar sığorta ekspertləri - aqrar sığorta mexanizmində mühüm yer tutur. Sığortalanması üçün müraciət edilmiş təsərrüfatlara baxış keçirilərək, risklərin qiymətləndirilməsi, eləcə də hadisə baş verən təsərrüfat və əkin sahələrində hadisələrin araşdırılması, dəymiş zərərin hesablanması aqrar sığorta ekspertləri tərəfindən həyata keçirilir.
Fermerlərə aqrar sığorta ödənişinin edilməsi barədə qərar ekspertlərin rəyi əsasında həyata keçirilir. Aqrar sığorta eksperti fəaliyyəti ödənişlidir – göstərdiyi xidmətlərə görə, onlara xidmət haqqı, eləcə də yol pulu ödənişi edilir. Xidmət haqqı ekspertin baxış keçirdiyi təsərrüfatların və əkin sahələrinin sayı, ərazinin sahəsi, baxış keçirilən heyvan sayı və digər amillərdən asılı olaraq hesablanır.
Bayram günlərində işləyən ekspertlər üçün xidmət haqları 50 faiz, işğaldan azad edilmiş ərazilərdə isə 2 qat artıq hesablanır. Aktiv fəaliyyət göstərən ekspertlərin orta aylıq gəlirləri 1500-2000 manatdan başlayır və daha yüksək məbləğlərə çatır.
Aqrar Sığorta Fondunda keçirilən təlimlərdən sonra namizədlər Dövlət İmtahan Mərkəzinin (DİM) təşkil etdiyi imtahanlarda iştirak edəcəklər. Uğur qazanan (60 faiz çox bal toplayan) namizədlər müvafiq sertifikat alacaq, adları Azərbaycan Mərkəzi Bankının (AMB) müvafiq reyestrinə daxil ediləcək və Aqrar Sığorta Fondu ilə xidməti müqavilə bağlayaraq fəaliyyətə başlaya biləcəklər.
Aqrar sığortanın əhatə dairəsi genişləndikcə, qeydə alınan sığorta hadisələri və fermerlərə ödənişlər də artmaqdadır. 2025-ci ilin ilk yarım ilinin nəticələrinə görə, Aqrar Sığorta Fondu tərəfindən fermerlərə 4,4 milyon manat sığorta ödənişi edilib. Bu, əvvəlki ilin eyni dövrü ilə müqayisədə 55 faiz artıqdır.
Bölmənin digər xəbərləri
