ARDNŞ-in Ekologiya İdarəsi məktəblilər üçün ekskursiyalar təşkil edir
Bakı, 23 fevral (AZƏRTAC). Azərbaycan Respublikası Dövlət Neft Şirkətinin (ARDNŞ) Ekologiya İdarəsi və Təhsil Nazirliyinin Ekoloji Tərbiyə və Təcrübəçilik Mərkəzi məktəblilər üçün ekoloji ekskursiyaların təşkili istiqamətində birgə fəaliyyət göstərmək haqqında razılığa gəlmiş, bu məqsədlə xüsusi qrafik hazırlanmışdır.
ARDNŞ-in mətbuat xidmətindən AZƏRTAC-a bildirmişlər ki, bu yaxınlarda Laçın şəhəri 6 nömrəli məktəbin şagirdləri üçün Yanardağa və “Atəşgah məbədi” Dövlət tarix-memarlıq qoruğuna ekskursiya təşkil olunmuşdur. İdarənin əməkdaşları məktəblilərə tarixi abidələr və milli-mənəvi dəyərlərimiz haqqında məlumatlar vermiş, ətraf mühitin qorunması, ekoloji mədəniyyət və təbiətlə düzgün davranış qaydaları haqqında söhbət aparmış, onlara ətraf mühiti qorumağı tövsiyə etmişlər. Ekskursiya məktəblilər tərəfindən maraqla qarşılanmışdır.
Fevralın 25-də 64 nömrəli məktəbin şagirdləri üçün AMEA-nın Zoologiya Muzeyinə ekskursiyanın təşkili planlaşdırılır. Gənc nəslin ekoloji cəhətdən maarifləndirilməsi məqsədi daşıyan silsilə ekskursiyalar cari ilin fevral-may aylarında, ayda 2 dəfə təşkil olunacaqdır. Məktəblilərin Qala Arxeoloji - etnoqrafik muzey kompleksi, AMEA-nın Mərdəkan Dendrarisi və s. ilə tanış olmaları nəzərdə tutulmuşdur.
Bölmənin digər xəbərləri
