AZƏRTAC-ın müxbiri xəbər verir ki, Astara şəhərində uşaq-gənclər şahmat məktəbləri komandalarının respublika birinciliyinin final yarışları başa çatmışdır. Bununla əlaqədar Astara şahmat məktəbində toplantı keçirilmişdir.

“Təhsil” respublika idman mərkəzinin direktor müavini İbrahim Məmmədov mərasimində çıxış edərək birinciliyin nəticələri haqqında məlumat vermiş, qalibləri təbrik etmiş, yarışların yüksək səviyyədə keçməsinə göstərdikləri köməyə görə rayon və şahmat məktəbinin rəhbərliyinə minnətdarlığını bildirmişdir.

Astara Rayon İcra Hakimiyyəti başçısının müavini Natiq İbadov, rayon təhsil şöbəsinin müdiri Qızbəs Məmmədova, Əli Bayramlı şahmat məktəbinin direktoru Xanqulu Tağıyev və Naxçıvan şahmat məktəbinin direktoru Həsən Məmmədov çıxış edərək gənc şahmatçılara yeni qələbə sevincləri arzulamışlar.

Oğlanlar arasında komanda yarışlarında Sumqayıt olimpiya ehtiyatları şahmat məktəbinin idmançıları birinci, Gəncə şahmatçıları ikinci, Əli Bayramlı məktəbliləri isə üçüncü yeri tutmuşlar.

Qızlar arasında respublika olimpiya ehtiyatları şahmat məktəbinin idmançıları fərqlənmişlər. Gəncəli qızlar ikinci, Bakının Nəsimi rayonunun gənc şahmatçıları isə üçüncü yerə layiq görülmüşlər.

Öz taxtalarında daha yaxşı nəticələr göstərən şahmatçılar arasında Vüqar Rəsulov (Gəncə), Rəşad Həsənov (Sumqayıt), Elvin Cəlalzadə və Ceyhun Məmmədzadə (Əli Bayramlı), Xəyalə İsgəndərova və Nigar Əliyeva (Respublika şahmat məktəbi) qızıl medalların sahibi olmuşlar.

Astara şahmat məktəbinin direktoru Azər İbrahimov Təhsil Nazirliyinin fəxri fərmanı ilə təltif olunmuşdur.

Qaliblərə “Təhsil” respublika idman mərkəzinin kubokları, diplomları və qiymətli hədiyyələri təqdim olunmuşdur.