Aviqdor Liberman: Dünyanın heç bir siyasətçisi məndə Heydər Əliyev kimi təəssürat yaratmayıb
Bakı, 10 may, AZƏRTAC
Siyasi karyeramın müxtəlif mərhələlərində mənə həm ABŞ Prezidenti, Roma Papası, Almaniya kansleri ilə, eləcə dünya siyasətində tanınmış şəxsiyyətlərlə görüşmək nəsib olub. Heç kim tanışlığın ilk dəqiqəsindən məndə Heydər Əliyev kimi təəssürat yaratmayıb. Onun cazibədarlığı, danışıq tərzi, ünsiyyət zamanı xüsusi kübarlığı və eyni zamanda, sadəliyi elə güclü təəssürat yaradırdı ki, sanki o, həmsöhbətinə hipnoz təsiri göstərmək qabiliyyətinə malikdir.
AZƏRTAC xəbər verir ki, bu fikirləri “Rus dilində İsrail xəbərləri” nəşrinə müsahibəsində israilli siyasətçi, “İsrail bizim evimizdir” partiyasının lideri, Knessetin deputatı Aviqdor Liberman Heydər Əliyev ilə görüşlərini yada salarkən deyib.
“1997-ci ilin yayında, - mən o vaxt hökumət başçısı nazirliyinin baş direktoru vəzifəsində idim, Netanyahu mənə onun Asiya turnesini planlaşdırmağı tapşırdı. Bu, Netanyahunun birinci hökuməti və onun Asiya ölkələrinə ilk səfərləri idi. Mən iclas təşkil etdim, orada Xarici İşlər Nazirliyinin və Milli Təhlükəsizlik Şurasının nümayəndələri iştirak edirdi. Turne zamanı iki ölkəyə - Yaponiya və Cənubi Koreyaya nəzərdə tutulan səfərlə bağlı hökumət başçısı nazirliyinin, XİN-in və Milli Təhlükəsizlik Şurasının nümayəndələri çox tez razılığa gəldilər. Ancaq müşavirədə Mərkəzi Asiya və Qafqaz regionları ilə əlaqədar, xüsusilə də Azərbaycana səfərin məqsədəuyğunluğu ilə bağlı məsələ ətrafında qızğın diskussiya yarandı. Mən XİN və Təhlükəsizlik Şurasının məruzələrini dinləyib, bu qurumların əməkdaşlarının geniş biliyə sahib olmasını dəyərləndirib və onların əsaslandırmalarına yekun vuraraq, öz fikrimi dedim: İsrailin Mərkəzi Asiya regionunda və Qafqazda yeganə real müttəfiqi var və bu, Azərbaycandır.
Azərbaycanın tarixi ərzində heç vaxt antisemitizm, yəhudilərə qarşı talan və təqib olmayıb. Yəhudilər həmişə burada özlərini sakit və təhlükəsiz hiss ediblər. Bu, təkcə dağ yəhudilərinə deyil, XIX əsrin əvvəllərində Azərbaycanda məskunlaşmağa başlayan aşkenazi yəhudilərinə də aiddir. İsrail və Azərbaycan arasında strateji əməkdaşlıq potensialına uzunmüddətli nöqteyi-nəzərdən, təhlükəsizlik və mənafe birliyindən baxaraq, mən Azərbaycana heç bir alternativ olmadığına əminliyimi bildirdim. Müşavirənin bütün iştirakçıları mənim fikrimlə razılaşdılar”, - deyə Aviqdor Liberman söhbətinə davam edib.
1997-ci ilin avqustunda Baş nazirin rəhbərlik etdiyi İsrail nümayəndə heyəti ilk dəfə Bakıda səfərdə oldu. İsrailli siyasətçi deyib: “Biz təxminən axşam saat 7-də təyyarədən endik. Azərbaycan Prezidenti ilə görüş Bakıda, onun iqamətgahında olmalı idi. Lakin Heydər Əliyev görüşü Xəzər dənizi sahilindəki iqamətgahında keçirməyi təklif etdi. O dedi: “Hərəyə bir fincan qəhvə içərik, qüruba baxarsınız və hava limanına qayıdarsınız”. “Bir fincan qəhvə” çox tutumlu oldu, çünki biz Xəzər dənizi üzərində nəinki qürubu, həm də şəfəqi seyr etdik və bizim görüşümüz növbəti gün səhər təxminən saat 8-də bitdi. Bu görüşün belə uzun çəkməsinin səbəbi Heydər Əlirza oğlunun qeyri-adi şarmı, onun erudisiyası, həm regional, həm də dünya siyasətində baş verənləri dərindən anlaması idi”.
Knessetin deputatı Netanyahunun ovaxtkı müşaviri Uzi Aradın da həmin uzun gecə söhbətində iştirakını qeyd etdi, onların da Heydər Əliyevin analitik məharətinə, onun irəliyə baxmaq qabiliyyətinə heyran qalmalarından söz açdı: “Söhbət bitəndən sonra biz çıxdıq və mən Uzi Araddan təəssüratlarını soruşdum. O, qısaca cavab verdi: “Qüdrətli liderdir”. O vaxtdan təxminən 26 il keçib. Heydər Əliyev ilə bu görüş mənim yaddaşıma həm XİN başçısı, həm müdafiə naziri, həm də maliyyə naziri qismində iştirakçısı olduğum digər çoxsaylı yüksəksəviyyəli görüşlərdən daha aydın həkk olunub.
Həmin yaddaqalan görüşdə İsrail-Azərbaycan ikitərəfli münasibətlərinin təməli qoyulmuşdu və bu münasibətlər daha sonra Heydər Əliyevin oğlu və varisi, Azərbaycanın hazırkı Prezidenti İlham Əliyevin fəal köməyi və dəstəyi ilə coşqun şəkildə inkişaf etməkdə davam etdi. Mən fəxr edirəm ki, qeyri-adi lider Heydər Əlirza oğlu Əliyev ilə görüşmək, Azərbaycanın İsraildəki səfirliyinin açılması və xarici işlər nazirlərinin bu yaxınlardakı qarşılıqlı səfərləri ilə İki dost dövlətlər arasında mövcud ola biləcək tam həcmdə diplomatik münasibətlərin qurulmasının mənbəyində durmaq şərəfinə nail olmuşam”.
Bölmənin digər xəbərləri
