“Avrasiyada biomüxtəliflik - SEAB 2024” VII beynəlxalq simpoziumu keçirilir
Bakı, 22 avqust, AZƏRTAC
Avqustun 22-də Türkiyənin Ərzurum şəhərində “Avrasiyada biomüxtəliflik - SEAB 2024” VII beynəlxalq simpoziumu işə başlayıb. Tədbir Azərbaycan Respublikası Elm və Təhsil Nazirliyi Dendrologiya İnstitutu, Odlar Yurdu Universiteti, Ərzurum Texniki Universiteti, Atatürk Universiteti, Muğla Sıtkı Koçman Universiteti, Al-Farabi Qazax Milli Universiteti, Bitki Biologiyası və Bioteхnologiyası İnstitutu (Qazaxıstan), Hüceyrə Biologiyası və Genetik Mühəndisliyi İnstitutu, Ukrayna Milli Elmlər Akademiyası, Kiyev Taras Şevçenko Milli Universiteti, Gürcüstan Kənd Təsərrüfatı Elmləri Akademiyası, Rusiya Dövlət Aqrar Universiteti, Belarus Dövlət Universitetinin birgə təşkilatçılığı ilə keçirilir.
Dendrologiya İnstitutundan AZƏRTAC-a bildirilib ki, simpoziuma onlayn qoşulan direktor Minarə Həsənova beynəlxalq tədbirin biomüxtəlifliyin aktual elmi problemlərinə həsr olunduğunu söyləyib. O, çıxışında Prezident İlham Əliyevin Azərbaycanın ekoloji problemlərinin həllinə, ekoloji vəziyyətin yaxşılaşdırılmasına, ətraf mühitin mühafizəsinə, təbii sərvətlərdən səmərəli istifadə məsələlərinə daim xüsusi qayğı ilə yanaşdığını, ölkədə biomüxtəlifliyin qorunmasına yönəldilmiş sərəncamlar verdiyini vurğulayıb. Qeyd edib ki, bu baxımdan Azərbaycanda “Yaşıl həyat”, “Yaşıl ekologiya”, “Ağıllı kənd” və “Ağıllı şəhər” layihələrinə böyük üstünlük verilir. M.Həsənova iqlim dəyişkənliyinin təsirinin elmi əsaslarla araşdırılması, meşə ərazilərində genefondun qorunması, biomüxtəlifliyin zənginləşdirilməsi, ətraf mühitin mühafizəsi, nadir və nəsli kəsilməkdə olan növlərin qiymətləndirilməsi, təbii ehtiyatlardan düzgün və səmərəli istifadə edilməsi, onların bərpası üzrə beynəlxalq səviyyədə elmi tədqiqatların aparılması yönündə alimlərə uğurlar arzulayıb.
Tədbirdə Türkiyə Atatürk Universitetinin rektoru Ahmet Hacımüftioğlu, Türkiyə Ərzurum Texniki Universitetinin rektoru Bülent Çakmak, Dendrologiya İnstitutu Droxronologiya laboratoriyasının müdiri Ramazan Məmmədov çıxış edərək beynəlxalq simpoziumun Avrasiya üzrə tədqiqatçıları bir araya gətirərək ən son elmi tapıntıları paylaşmaq, multidisiplinar əməkdaşlıq qurmaq və qlobal ətraf mühit problemlərinə yenilikçi həllər axtarmaq məqsədi daşıdığını vurğulayıblar.
Simpozium avqustun 24-dək davam edəcək.
Qeyd edək ki, “SEAB 2024” simpoziumuna “TÜBİTAK 2023” dəstək göstərir, bu da məqalə qəbulunun ödənişsiz olmasını təmin edir.
Bölmənin digər xəbərləri
