Avropada karbon emissiyaları ilin birinci rübündə 2,9 faiz azalıb
Bakı, 17 avqust, AZƏRTAC
Avropa İttifaqı (Aİ) ölkələrində qalıq yanacaqların enerji məqsədləri üçün istifadəsi nəticəsində yaranan karbon emissiyaları ilin birinci rübündə əvvəlki ilin eyni dövrü ilə müqayisədə 2,9 faiz azalaraq 941 milyon tona düşüb.
AZƏRTAC Avropa Statistika İdarəsinin məlumatına istinadla xəbər verir ki, ilin birinci rübündə karbon emissiyalarında ən yüksək payı 24 faizlə yaşayış evləri, 20 faizlə emal sənayesi, 19 faizlə elektrik və qaz təchizatı təşkil edib.
Sözügedən dövr ərzində 21 Aİ ölkəsində karbon emissiyaları azalıb. Karbon emissiyalarının ən çox azaldığı ölkələr 15,2 faizlə Bolqarıstan, 14,7 faizlə Estoniya və 9,6 faizlə Sloveniya olub.
Karbon emissiyalarının ən çox artdığı ölkələr isə 9,1 faizlə İrlandiya, 7,5 faizlə Latviya, 1,9 faizlə Slovakiya, 1,7 faizlə Danimarka, 1,6 faizlə İsveç və 0,3 faizlə Finlandiya olaraq qeydə alınıb.
Məlumata görə, ilin birinci rübündə ötən ilin müvafiq dövrü ilə müqayisədə 9 sektordan 5-də karbon emissiyaları azalıb. Bu çərçivədə ən yüksək azalma 12,3 faizlə elektrik və qaz təchizatında, ən yüksək artım isə 7,2 faizlə daşınma və anbarda olub.
Bölmənin digər xəbərləri
