“AZƏRAİDA ADASI” KİTABININ TƏQDİMAT MƏRASİMİ OLMUŞDUR
AZƏRTAC xəbər verir ki, Hollandiyada yaşayan həmyerlimiz, “Ana Vətən” Avropa Azərbaycanlı Qadınlar Birliyinin sədri, yazıçı Gülşən Kazımovanın “AzərAida adası” romanının Beynəlxalq Ticarət Mərkəzində Xarici Ölkələrdə Yaşayan Azərbaycanlılarla İş üzrə Dövlət Komitəsinin təşkilatçılığı ilə təqdimatı olmuşdur.
Xarici Ölkələrdə Yaşayan Azərbaycanlılarla İş üzrə Dövlət Komitəsi sədrinin müavini Valeh Hacıyev, Azərbaycanın Niderland krallığındakı səfiri Fuad İsgəndərov, Azərbaycan-Hollandiya Dostluq Cəmiyyətinin sədri Əhməd Qəşəmoğlu, Milli Məclisin deputatları Vidadi Məmmədov, Musa Quliyev, akademik Budaq Budaqov və başqaları çıxış edərək əsərlə bağlı fikirlərini söyləmişlər.
Bildirilmişdir ki, romanda sovet dövründə bir-birini sevən iki gəncin faciəli həyatından bəhs edilir. Bu sevgi dastanında Ermənistanın Azərbaycana təcavüzü məsələsinə, o cümlədən Azərbaycan mədəniyyətinə geniş yer verilmişdir.
Kitabı yüksək qiymətləndirən natiqlər vurğulamışlar ki, bu əsər Azərbaycan həqiqətlərinin dünya ictimaiyyətinə çatdırılmasında, azərbaycançılıq ideyasının geniş yayılmasında mühüm rol oynayacaqdır.
Mərasimdə “Ana Vətən” diaspor təşkilatının fəaliyyəti ilə bağlı videomaterial göstərilmişdir.
Tədbirdə diplomatik korpusun təmsilçiləri, ziyalılar, ictimaiyyətin nümayəndələri iştirak etmişlər.
Bölmənin digər xəbərləri
