Azərbaycan 15-ci Beynəlxalq Elektron Kommunikasiya və Poçt Tənzimləyiciləri Konfransında təmsil olunub
Bakı, 5 iyun, AZƏRTAC
İnformasiya Kommunikasiya Texnologiyaları Agentliyinin (İKTA) İdarə Heyəti sədrinin müavini Ceyhun Hüseynzadə Ankarada keçirilən 15-ci Beynəlxalq Elektron Kommunikasiya və Poçt Tənzimləyiciləri Konfransında ölkəmizi təmsil edib.
Agentlikdən AZƏRTAC-a bildirilib ki, Türkiyənin İnformasiya Texnologiyaları və Rabitə Qurumunun (BTK) təşkilatçılığı ilə “Rəqəmsal gələcək: elektron kommunikasiya və poçt sektorlarının transformasiyası” mövzusunda keçirilən tədbir 22 müxtəlif ölkədən 250-dən çox iştirakçını bir araya gətirib.
Konfrans çərçivəsində təşkil olunan 5 sessiyada “Rəqəmsal infrastruktur və tənzimləyici çərçivələr”, “Rəqəmsallaşmanın yenidən nəzərdən keçirilməsi”, “Poçt və elektron kommunikasiya sektorlarında təhlükəsizlik”, “Poçt sektorunda yeni tənzimləmə perspektivləri” və “Poçt xidmətlərində yeni tendensiyalar və tənzimləmə gözləntiləri” mövzuları müzakirə olunub.
İKTA-nın İdarə Heyəti sədrinin müavini Ceyhun Hüseynzadə “Rəqəmsal infrastruktur və tənzimləyici çərçivələr” sessiyasında çıxış edib. Qurum rəsmisi çıxışında Azərbaycanda internet infrastrukturu, tənzimləmə və nəzarət, telekommunikasiya bazarlarında vəziyyət və telekommunikasiya operatorları arasında qarşılıqlı arabağlantı məsələləri haqqında danışıb.
Bölmənin digər xəbərləri
