Azərbaycan Basketbol Federasiyasının vitse-prezidenti: Başlıca məqsəd dünya çempionatına vəsiqə qazanmaq olacaq
Bakı, 12 may, AZƏRTAC
Seçmə mərhələdə üz-üzə gələcəyimiz Latviya və Misir yığmaları 3x3 basketbolda ənənələri olan komandalardır.
Bu sözləri AZƏRTAC-a açıqlamasında Azərbaycan Basketbol Federasiyasının (ABF) vitse-prezidenti Fərrux Mahmudov 3x3 üzrə qadınlardan ibarət yığmamızın Bakıda təşkil olunacaq dünya çempionatının seçmə mərhələsindəki şansları barədə danışarkən deyib.
Onun sözlərinə görə, hər iki kollektiv seçmə mərhələnin ən güclüləri sayılır: “Lakin biz də zəif deyilik. Uğurlu nəticə əldə etmək üçün qızlarımızın sona qədər döyüşəcəyinə əminəm. Ölkəmizdə ilk dəfə keçiriləcək mötəbər basketbol turnirində müsbət nəticə qazanacağımıza inanıram. Basketbol kağız üzərində deyil, parketdə oynanılan oyundur. Başlıca məqsəd dünya çempionatına vəsiqə qazanmaq olacaq”.
Federasiya nümayəndəsi komandaya cəlb olunan Arika Karter və Brianna Frezer barədə də danışıb: “Hər iki basketbolçu öz klublarında yaxşı mövsüm keçirib. Onlar oyun ritmlərini də qoruyublar. Arika Karterin seçmə oyunlarda iştirakı dəqiqləşib, amma eyni sözü Brianna Frezer haqqında deyə bilmirəm. Onun millidə olması bu həftə təsdiqini tapacaq”.
Qeyd edək ki, Azərbaycan millisi mayın 24-də saat 10:15-də Misir, ertəsi gün saat 12:05-də isə Latviya ilə üz-üzə gələcək.
Bölmənin digər xəbərləri
