Azərbaycan-Çin: münasibətlərdə birgəlik və yüksək inkişaf
Bakı, 24 aprel, AZƏRTAC
Azərbaycan-Çin münasibətləri qədim və möhkəm təməllərə dayanır. Çin 1991-ci il dekabrın 27-də Azərbaycanın müstəqilliyini tanıyıb. 1992-ci il aprelin 2-də isə Bakı ilə Pekin arasında diplomatik əlaqələr qurulub. İki ölkə arasında əlaqələrin qurulmasında və inkişaf etməsində Ümummilli Lider Heydər Əliyevin misilsiz xidmətləri olduğunu da xüsusi vurğulamaq lazımdır. Ulu Öndərin 1994-cü ilin mart ayında Çinə səfəri ölkələrimiz arasında dərin əlaqələrin qurulmasına səbəb olub. Həmin səfər zamanı iki dövlət arasında 8 saziş imzalanıb.
Bu fikirləri AZƏRTAC-a açıqlamasında Milli Məclisin deputatı, filologiya elmləri doktoru Elnarə Akimova söyləyib. “Prezident İlham Əliyev də Çinlə münasibətlərin inkişaf etdirilməsinə xüsusi diqqət göstərir. Prezident İlham Əliyev 2005-ci il mart ayında Çinə ilk səfərini etdi. Həmin səfər çərçivəsində də ikitərəfli əlaqələrin daha inkişaf etdirilməsi baxımından olduqca mühüm addımlar atıldı. Artıq uzun illərdir ki, Azərbaycanla Çin arasında siyasi, iqtisadi, mədəni, humanitar və bir çox sahədə yüksəksəviyyəli əlaqələr mövcuddur. Üstəlik, Çin Ermənistan-Azərbaycan “Dağlıq Qarabağ” münaqişəsi zamanı da ölkəmizin ərazi bütövlüyünü və suverenliyinə dəstəyini ifadə edib. Ümumiyyətlə, Azərbaycan və Çin bir-birinin ərazi bütövlüyünü dəstəkləyir”, - deyə o əlavə edib.
Deputat vurğulayıb ki, bu gün Azərbaycan-Çin münasibətləri yüksələn xətlə inkişaf edir, iki ölkə arasında müxtəlif istiqamətlərdəki münasibətlərin daha da inkişaf etməsi üçün perspektivlər var. Hazırda tərəflər arasındakı münasibətlər çox yüksək səviyyədədir.
Bu gün Çin Azərbaycanın qarşısında duran əsas hədəflərdən biri olan Zəngəzur dəhlizinin açılmasını dəstəkləyir. Çünki bu layihə Pekin üçün də böyük əhəmiyyət kəsb edir. Zəngəzur dəhlizinin açılması Çindən Avropaya uzanan yolun açılması baxımından da çox önəmlidir. Ona görə rəsmi Pekin ən yüksək səviyyədə Zəngəzur dəhlizinin açılması təklifinə dəstəyini ifadə edir.
Deputat vurğulayıb ki, Prezident İlham Əliyev və birinci xanım Mehriban Əliyevanın Çinə səfəri iki ölkə arasında dost münasibətlərin zirvə məqamlarını yaşaması üçün böyük bir stimul olacaq. Dövlətimizin başçısının Pekində yüksək səviyyədə qarşılanması da iki ölkə arasındakı münasibətlərin hansı səviyyədə olduğunun əyani sübutudur. Bu səfər çərçivəsində Azərbaycan ilə Çin arasında 20-yə yaxın rəsmi sənəd imzalandı. Tərəflər arasında hərtərəfli strateji tərəfdaşlıq əlaqələrinin qurulması haqqında Birgə Bəyanatın imzalanmasını xüsusi vurğulamaq lazımdır.
“Həmçinin iki ölkə arasında viza rejiminin ləğv olunması ilə yanaşı, bir sıra nazirliklər arasında əməkdaşlıq haqqında sənədlərin imzalanması olduqca mühümdür. Ümumiyyətlə, bu gün iki ölkə başçısının Çində bir araya gəlməyi qlobal prioritetlərin formalaşmasında, bərabərliyə və inklüzivliyə əsaslanan dünyanın yaranmasında Qlobal Cənubun artan rolunu və təsirini əks etdirir”, - deyə E.Akimova fikrini yekunlaşdırıb.
Bölmənin digər xəbərləri
