Azərbaycan ərazisində radiasiya fonu norma daxilindədir
Bakı, 31 mart (AZƏRTAC). Ekologiya və Təbii Sərvətlər Nazirliyinin (ETSN) mütəxəssisləri bildirmişlər ki, Yaponiyanın “Fukuşima-1” AES-dən sızma nəticəsində yaranan qazların Azərbaycan ərazisinə daxil olma ehtimalı yoxdur.
ETSN-dən AZƏRTAC-a verilən məlumata görə, buna səbəb küləyin əks, yəni Amerika qitəsi istiqamətinə əsməsidir. Fərqli vəziyyət yaransa belə, buludlar Tayqa meşələri və okeanın üzərindən keçərkən öz radioaktivlik təhlükəsini itirəcəkdir.
Respublikamızın radioaktivlik təhlükəsizliyini təmin etmək məqsədi ilə nazirlik tərəfindən vaxtaşırı monitorinqlər aparılır və məlumatlar təhlil olunaraq aidiyyəti dövlət orqanlarına göndərilir. Martın 25-dən 30-dək ölkə ərazisində ETSN-in Ətraf Mühit üzrə Milli Monitorinq Departamenti tərəfindən aparılmış növbəti monitorinqlərin nəticələrinə görə, günəş şüalarının fəallığından və dağ süxurlarının fiziki-kimyəvi xüsusiyyətlərindən asılı olaraq gündəlik təbii radiasiya fonu mövsümə uyğun olmuş və normanı keçməmişdir.
Bölmənin digər xəbərləri
