AZƏRBAYCAN HƏMKARLAR İTTİFAQLARI KONFEDERASİYASI İCRAİYYƏ KOMİTƏSİNİN NÖVBƏTİ İCLASI KEÇİRİLMİŞDİR
Bakı, 24 fevral (AZƏRTAC). Fevralın 24-də Azərbaycan Həmkarlar İttifaqları Konfederasiyası (AHİK) İcraiyyə Komitəsinin iclası olmuşdur.
İclas iştirakçıları Xocali faciəsi qurbanlarının xatirəsini bir dəqiqəlik sükutla yad etmişlər.
AHİK-in sədri, Milli Məclisin deputatı Səttar Mehbalıyev bildirmişdir ki, Ermənistan-Azərbaycan, Dağlıq Qarabağ münaqişəsinin ən faciəvi nöqtəsi Xocalıda ermənilər tərəfindən törədilmiş soyqırımdır. Bu soyqırımı aktı nəticəsində ailələr məhv edilmiş, mülki əhali görünməmiş qəddarlıqla qətlə yetirilmiş, əsir götürülənlərə amansızcasına işgəncələr verilmişdir. Erməni cəlladlarının törətdikləri bu vəhşilik və vandalizm aktı bəşəriyyətin əsl soyqırımı kimi tanıdığı, XX əsrin ən dəhşətli cinayətləri - Xatın, Sonqmi, Liditsa soyqırımları ilə eyni səviyyədə durur. Xocalı faciəsi insanlıq tarixinə düşmüş qanlı olay kimi qiymətləndirilməlidir. Dünyanın sivil dövlətləri, nüfuzlu beynəlxalq təşkilatlar Xocalı haqqında acı həqiqətləri bilməli, insanlığa qarşı törədilən bu cinayət öz siyasi-hüquqi qiymətini almalıdır.
İclasda çıxış edənlər demişlər ki, ayrı-ayrı ölkələrin həmkarlar ittifaqları liderləri ilə görüşlərdə, beynəlxalq tədbirlərdə Xocalı faciəsinin əsl səbəblərini, miqyasını və mahiyyətini onlara çatdırmaq bizim insanlıq borcumuzdur. Bu, bir tərəfdən Xocalı müdafiəçilərinin və şəhidlərinin ruhu qarşısında bizim insanlıq və vətəndaşlıq borcumuzdur, digər tərəfdən isə, insanlığa qarşı yönəlmiş bu cür qəddar cinayətlərin gələcəkdə təkrar olunmaması üçün mühüm şərtdir.
Sonra İcraiyyə Komitəsinin iclasında gündəlikdə duran məsələlər müzakirə edilmişdir. Azərbaycan Respublikası Nazirlər Kabineti, AHİK və Azərbaycan Respublikası Sahibkarlar (İşəgötürənlər) Təşkilatlarının Milli Konfederasiyası arasında 2010-2011-ci illər üçün Baş Kollektiv Sazişlə əlaqədar aparılan danışıqların nəticələri müsbət qiymətləndirilmişdir. Həmin sazişin icrasına dair hazırlanmış tədbirlər planı təsdiq edilmiş, konfederasiyanın şöbələrinə, AHİK-in tabeliyində olan təşkilatlara tapşırılmışdır ki, Baş Kollektiv Sazişdə əks olunan müvafiq sahələr üzrə vəzifə və tövsiyələrin icrasını daimi nəzarətdə saxlasınlar.
İcraiyyə Komitəsi “Vətəndaş cəmiyyəti sistemində Azərbaycan Həmkarlar İttifaqları Konfederasiyasının inkişaf konsepsiyası”na üzv təşkilatlar tərəfindən təklif edilən əlavə və dəyişiklikləri nəzərə alaraq konsepsiyanın həyata keçirilməsi istiqamətində müvafiq işlərin görülməsini üzv təşkilatlara tövsiyə etmişdir.
Gənclər siyasətinin həyata keçirilməsi üzrə 2010-2013-cü illər üçün AHİK-in tədbirlər planı haqqında məlumat verilmişdir. Bildirilmişdir ki, AHİK dövlət gənclər siyasətinin hüquqi və iqtisadi cəhətdən təmin olunmasında, habelə kompleks və məqsədli gənclər proqramlarını nəzərdə tutan qanunvericilik aktlarının işlənib hazırlanmasında fəal iştirak edir. Qeyd olunmuşdur ki, əməkçilərin sosial-iqtisadi məsələləri üzrə müvafiq dövlət və təsərrüfat orqanları ilə sazişlər bağlanarkən gənclərin sosial müdafiəsi tədbirləri müəyyən olunmalıdır. Mülkiyyət formasından asılı olmayaraq müəssisə və idarələrdə gənclərin hüquqlarına riayət olunmasına nəzarət edilməli, onların hüquq və mənafelərinin müdafiəsi üzrə həmkarlar ittifaqı orqanlarının metodik rəhbərliyi həyata keçirilməli və fəaliyyətin əlaqələndirilməsinə üstünlük verilməlidir.
İclasda gənclər siyasətinin həyata keçirilməsi üzrə tədbirlər planı təsdiq olunmuşdur.
Nəqliyyat sistemində Həmkarlar İttifaqları Respublika komitələrinin sazişlərin və kollektiv müqavilələrin bağlanması və yerinə yetirilməsi sahəsində gördüyü işlər haqqında məlumat da dinlənilmiş və müvafiq qərar qəbul edilmişdir.
İclasda AHİK İcraiyyə Komitəsinin və aparatın cari ilin I yarımilliyi üçün iş planı, habelə həmkarlar ittifaqları kadr və fəallarının 2010-cu il üçün təhsil planı təsdiq edilmişdir.
Bölmənin digər xəbərləri
