Azərbaycan-Mərkəzi Asiya münasibətləri yeni strateji mərhələyə qədəm qoyur ŞƏRH
Bakı, 16 noyabr, AZƏRTAC
Son dövrlərdə regional geosiyasi proseslər və inteqrasiya meyilləri göstərir ki, Azərbaycan və Mərkəzi Asiya ölkələri arasında münasibətlər keyfiyyətcə yeni mərhələyə qədəm qoyur. Tarixi, mədəni və mənəvi bağlarımız artıq yalnız xalqlar arasında yaxınlığı ifadə etmir, həm də vahid siyasi əməkdaşlıq məkanını formalaşdırır. Bu meyillər fonunda Azərbaycan Mərkəzi Asiya regionunun ayrılmaz tərkib hissəsi kimi çıxış edir və bu status rəsmi, institusional səviyyələrdə təsdiq olunub.
Bu fikirləri AZƏRTAC-a açıqlamasında Milli Məclisin deputatı Müşfiq Məmmədli bildirib.
O qeyd edib ki, Azərbaycan Prezidenti İlham Əliyevin Özbəkistan Prezidenti Şavkat Mirziyoyevin dəvəti ilə Daşkəndə səfəri və noyabrın 16-da Mərkəzi Asiya Dövlət Başçılarının 7-ci Məşvərət Görüşündə iştirakı bu tarixi prosesin mühüm mərhələsidir. Həmin iclasda Azərbaycan Respublikasının Mərkəzi Asiya Dövlət Başçılarının Məşvərət Görüşündə tamhüquqlu iştirakı haqqında Qərarın imzalanması, əslində, ölkəmizin regionla inteqrasiyasının siyasi təsdiqi oldu. Bu addım göstərir ki, Mərkəzi Asiya artıq yalnız beş dövlətdən ibarət coğrafi məkan deyil, Azərbaycan bu ailənin tamhüquqlu üzvüdür və əməkdaşlıq platformasının aktiv iştirakçısına çevrilib.
“Bu yeni status Azərbaycanın gələcək regional proseslərdə rolunu daha da genişləndirəcək. Artıq Azərbaycan Mərkəzi Asiya çərçivəsində keçirilən bütün səviyyəli görüşlərdə - dövlət və hökumət başçılarının Zirvə toplantılarında, nazirliklərarası əməkdaşlıq mexanizmlərində, parlament platformalarında, həmçinin dövlət və ictimai təşkilatların birgə tədbirlərində iştirak edəcək. Bu, siyasi dialoqu gücləndirməklə yanaşı, iqtisadi, nəqliyyat-logistika, enerji təhlükəsizliyi, rəqəmsal inkişaf, humanitar əməkdaşlıq və digər istiqamətlərdə qarşılıqlı fəaliyyətə yeni dinamika gətirəcək”, - deyə deputat bildirib.
Müşfiq Məmmədli hesab edir ki, Azərbaycanın Mərkəzi Asiya istiqamətində bu şəkildə fəallaşması ölkəmizin Cənubi Qafqazdakı rolunu nə zəiflədir, nə də dəyişir. Azərbaycan Cənubi Qafqaz platformasında olduğu kimi, Mərkəzi Asiya əməkdaşlıq formatında da öz fəaliyyətini paralel və bir-birini tamamlayan şəkildə davam etdirir. Bu iki regional istiqamət arasında sinerji yaratmaq Azərbaycanın həm coğrafi mövqeyi, həm tarixi əlaqələri, həm də çoxvektorlu xarici siyasət kursunun nəticəsidir.
“Biz inanırıq ki, Azərbaycan-Mərkəzi Asiya əməkdaşlığının institusional şəkildə möhkəmlənməsi yalnız iştirakçı ölkələr üçün deyil, bütün Avrasiya məkanı üçün yeni strateji imkanlar açır. Xüsusilə nəqliyyat dəhlizlərinin şaxələndirilməsi, enerji təhlükəsizliyi, yeni iqtisadi marşrutların formalaşdırılması baxımından bu inteqrasiya bölgənin inkişafına mühüm töhfə verəcək. Azərbaycan bundan sonra da bu proseslərin mərkəzində dayanmaq potensialındadır”, - deyə deputat fikirlərini yekunlaşdırıb.
Bölmənin digər xəbərləri
