“AZƏRBAYCAN MİLLİ PARALİMPİYA KOMİTƏSİ-10 İL” KİTABI ÇAP OLUNMUŞDUR

03.02.2006 [18:51]
Çap et
A⁺ A^-

AZƏRTAC xəbər verir ki, “Azərbaycan Milli Paralimpiya Komitəsi-10 il” kitabı çapdan çıxmışdır. Komitənin 10 illiyi ilə əlaqədar nəfis şəkildə nəşr olunmuş kitabın müəllifləri Ziyadxan Kərimov və Soltan İmaməliyevdir.

Kitabda dünyada və Azərbaycanda paralimpiya hərəkatının yaranması və inkişafı, eləcə də 1996-cı il Atlanta, 2000-ci il Sidney və 2004-cü il Afina Yay Paralimpiya oyunlarında əlil idmançılarımızın qazandıqları uğurlar, ümummilli liderimiz, ulu öndər Heydər Əliyevin və dövlətimizin başçısı, Milli Olimpiya Komitəsinin prezidenti İlham Əliyevin onlara diqqət və qayğısından bəhs edən yazılar dərc olunmuşdur.

Nəşrdə 2008-ci ildə Pekində keçiriləcək XIII Yay Paralimpiya Oyunlarına lisenziya uğrunda beynəlxalq yarışlarda ölkəmizi təmsil edən milli yığma komandaların tərkibi barədə də məlumat verilir.

Rafiq Bağırov, İlqar Cəfərov və Dilavər Nəcəfovun çəkdikləri fotoşəkillərlə zəngin olan kitab yaxın günlərdə geniş ictimaiyyətə təqdim olunacaqdır.