AZƏRBAYCAN PREZİDENTİ İLHAM ƏLİYEV BAKININ NƏRİMANOV RAYONU ƏRAZİSİNDƏ YENİ SALINAN YOLLA TANIŞ OLMUŞDUR
Azərbaycan Prezidenti İlham Əliyev dekabrın 14-də Bakının Nərimanov rayonu ərazisində, Nəsib bəy Yusifbəyli küçəsinin davamı olaraq yeni salınan 1,4 kilometr uzunluğunda olan yolla tanış olmuşdur.
Nəqliyyat naziri Ziya Məmmədov dövlətimizin başçısına məlumat verərək dedi ki, cənab Prezident, Sizin şəxsi təşəbbüsünüz və tapşırığınızla bu ərazidə yeni yol salınmışdır. Əslində, əvvəllər burada yol olmamışdır. Sizin Bakı şəhərində nəqliyyat vasitələrinin hərəkətinin tənzimlənməsi məqsədi ilə verdiyiniz göstərişə əsasən, “Gənclik” meydanından Ceyhun Hacıbəyli (keçmiş Fabritus) küçəsinədək 650 metrlik dördzolaqlı yol salınmışdır. Biz bu yolu prospektə çevirmək məqsədi ilə onu Nəsimi rayonu ərazisinə, Səməd Vurğun küçəsinə qədər uzadacağıq. Bütövlükdə yolun uzunluğu 1400 metr olacaqdır. Dördzolaqlı yeni prospekt nəqliyyat vasitələrinin hərəkətinin tənzimlənməsində və tıxacların aradan qaldırılmasında mühüm rol oynayan əhəmiyyətli yola çevriləcəkdir. Bu yolun bir üstünlüyü də ondan ibarətdir ki, “Gənclik” meydanı istiqamətinə gedən əsas küçələr, prospektlərlə birləşəcəkdir. Buradan hərəkət etməklə Ceyhun Hacıbəyli küçəsinə, Həsən Əliyev prospektinə, Mirəli Qaşqay küçəsinə, Azadlıq prospektinə, Xan Şuşinski, Səməd Vurğun küçələrinə çıxmaq mümkün olacaqdır.
Cənab Prezident, Ceyhun Hacıbəyli küçəsinə qədər olan hissə Nəsib bəy Yusifbəyli küçəsi adlandığı üçün biz də yolun davamını şərti olaraq elə həmin küçənin adı ilə adlandırmışıq.
İLHAM ƏLİYEV: Yeni yol açılır, əvvəllər burada yol yox idi. Gərək, bura üçün ad da fikirləşək. Biz bu yolu keçmiş “Anten” adlandırılan ərazi hesabına açdıq. Faktik olaraq, bu yol “Anten” ərazisinin bir hissəsidir.
ZİYA MƏMMƏDOV: Cənab Prezident, tamamilə doğru deyirsiniz, Sizin tapşırığınızla bu ərazidən 25 metr enində zolaq ayrıldı. Bu, nəqliyyat vasitələri üçün həqiqətən də çox geniş imkanlar açır. Yolun hərəkət hissəsinin eni 16 metrdir. Piyadaların gediş-gəlişi üçün də şərait yaradılmışdır. Yeni açılan yol bütün istiqamətlərə gediş-gəlişi təmin etdiyinə görə Vaqif küçəsindən “Gənclik” meydanına doğru hərəkət birtərəfli olacaqdır. Bu, Vaqif küçəsində hərəkət intensiv olduğuna görə və təhlükəsizliyi təmin etmək baxımından zəruridir.
İLHAM ƏLİYEV: O küçəni də maksimum dərəcədə genişləndirmək lazımdır.
ZİYA MƏMMƏDOV: Bəli, genişləndirəcəyik və hərəkəti birtərəfli edəndə çox rahat olacaqdır.
İLHAM ƏLİYEV: Hansı tərəfdən?
ZİYA MƏMMƏDOV: Dədə Qorqud parkının yanından “Gənclik” meydanına qədər hərəkətin birtərəfli olması daha məqsədəuyğundur. “Gənclik” meydanından Təbriz küçəsi istiqamətdə yeni yolun çəkilməsini də nəzərdə tutmuşuq, bunun üçün imkan vardır. Həmin ərazidə gələcəkdə Diplomatik Akademiyanın tikiləcəyini də nəzərə alsaq, bu yola ehtiyac duyulacaqdır.
Dövlətimizin başçısına məlumat verildi ki, Bakı şəhərində beşinci körpünün tikintisi də başa çatmaqdadır və bir neçə digər layihələr üzərində də iş davam etdirilir.
Prezident İlham Əliyev “Gənclik” meydanının müasirləşdirilməsinin, Vaqif küçəsinin genişləndirilməsinin, paytaxtın digər yerlərində maksimum dərəcədə yeni yolların açılmasının vacibliyini vurğuladı.
Dövlətimizin başçısı avtomobilə əyləşərək, yeni yolun hazır hissəsi ilə hərəkət etdi, bu ayın sonunadək tamamlanacaq sahədə işlərin gedişi ilə tanış oldu, yolun çəkilişinə mane olan tikililərin sahiblərinə kompensasiya ödənilməklə sökülməsi, tıxacların aradan qaldırılması üçün digər yeni yolların salınması ilə bağlı müvafiq tövsiyə və tapşırıqlarını verdi.
Bölmənin digər xəbərləri
