AZƏRBAYCAN PREZİDENTİ İLHAM ƏLİYEVİN FRANSAYA RƏSMİ SƏFƏRİ
FRANSA SAHİBKARLAR TƏŞKİLATININ PREZİDENTİ FRANSUA PERİQONUN ÇIXIŞI
Xanımlar və cənablar!
Cənab Prezident, böyük məmnuniyyətlə Sizi burada, Fransa Sahibkarlar Təşkilatının yeni qərargahında salamlamaq, həqiqətən, böyük şərəfdir. Çox təqdirəlayiq bir haldır ki, bu yeni binada keçirəcəyimiz bugünkü ilk mərasim Sizin gəlişinizə təsadüf edir. Cənab Prezident, mən Sizə və Sizi müşayiət edən nümayəndə heyətinin üzvlərinə minnətdarlığımı bildirmək istəyirəm ki, bu gün burada bizimləsiniz və Fransa biznesinin təmsilçiləri ilə görüşürsünüz. Əlbəttə ki, Sizin icazənizlə, bizim ticarət nazirinə də minnətdaram ki, bu gün bizimlədir. Biznes icmasının üzvləri üçün ticarət və kommersiya naziri ilə görüşmək həmişə xoşdur.
Fransa ilə Sizin ölkə arasında əlaqələr əla səviyyədədir. Bunu həm mənim səlahiyyətlərimə aid olmayan sahələr, həm də bizim cavabdeh olduğumuz iqtisadiyyat sahəsi haqqında demək olar. Yeni müstəqillik qazanmış ölkələrin siyahısına baxsaq görərik ki, Azərbaycan Fransanın iqtisadi əlaqələri siyahısında 4-cü yerdədir. Rusiya, Ukrayna, Qazaxıstan kimi böyük ölkələrdən sonra bu, əla göstəricidir. Sizin ölkə ilə ticarət əlaqələrimiz 2002-ci ildə xüsusi vüsət aldı, Almaniya və Rusiyadan sonra Fransa Azərbaycanın 3-cü böyük ticarət tərəfdaşına çevrildi. Fransa Azərbaycanın neft məhsullarının əsas istehlakçısı oldu. Fransa Azərbaycana birbaşa sərmayə qoyan ölkələr arasında 7-ci yeri tutur və sözsüz ki, biz istərdik mövqeyimizi daha da yaxşılaşdıraq.
Fransa şirkətləri istərdilər ki, Azərbaycanın iqtisadi inkişafına daha çox töhfə versinlər və bunu əlaqələri daha da gücləndirmək, sərmayələri artırmaq, Sizin ölkənin həm rəsmi dairələri, həm də biznes nümayəndələri ilə əməkdaşlığı yaxşılaşdırmaq vasitəsilə həyata keçirmək əzmindəyik. 1991-ci ildən indiyədək MEDEF vasitəsilə ölkəmizin şirkətlərinin Sizin nümayəndələrlə bir sıra görüşləri təşkil olunmuş, beləliklə həmin şirkətlərin Azərbaycanın müxtəlif sektorlarında işləməsi təmin edilmişdir. Neft və qaz sənayesində, infrastruktur quruculuğunda, kommersiya, sığorta və səhiyyə, yeyinti sənayesi, bank işi sahəsində işləmişlər. Bütün bunlar Fransa şirkətlərinin Sizin ölkənin inkişafında iştirakının göstəriciləridir.
Həmin görüşlərin təşkilatçıları və iştirakçıları indi Sizin qarşınızdadırlar və bugünkü görüş vasitəsilə onlar bu sahədəki işlərini davam etdirmək əzmində olduqlarını bildirirlər. Mən onların adlarını çəkməyəcəyəm. Sizə təqdim olunan siyahıda həmin şirkətlərin adları var. Mən “Teknip” şirkətindən cənab Veluya minnətdarlığımı bildirmək istəyirəm. O, bizim təşkilatımızda xüsusi rol oynayır. 2002-ci ilin aprelində cənab Kristian Mons, - o, Sizin yanınızda oturubdur, MEDEF təşkilatında Mərkəzi Asiya və Qafqazda əlaqələrə cavabdehdir, - olduqca mühüm biznes nümayəndə heyəti ilə Bakıya getmişdi. Səfər zamanı nümayəndə heyəti hökumətin bir sıra üzvləri ilə görüşdü. O vaxt imkan qazandıq ki, Sizin ölkəniz haqqında, onun strategiyası, prioritetləri haqqında çox şeyi öyrənək. Biz Sizin ölkənin sosial-iqtisadi vəziyyətini, siyasi mövqeyini dərindən öyrəndikdən sonra əməkdaşlıq və sərmayə qoymaq yollarını müəyyən etdik.
Əlbəttə, bugünkü şəraitdə dünyadakı hər bir ölkə, elə bizim ölkənin özü də, rəqabət aparmalı, addım-addım xarici investorları inandırmalıdır ki, ölkəyə sərmayə qoymaq sərfəli olacaqdır. Xarici sərmayəçiləri buna biznes mühitini günbəgün yaxşılaşdırmaqla inandırmaq olar. Burada sağlam rəqabət elementi bazar iqtisadiyyatı üçün böyük əhəmiyyət kəsb edir. Azərbaycanın inkişaf prosesi davam edir və biz müşahidə edirik ki, son iki ildə ölkənizdəki makroiqtisadi göstəricilər yüksələn xətlə artır. İcazənizlə, mən Azərbaycan hökumətini bu nailiyyət, xüsusilə də biznes mühitinin yaxşılaşdırılması münasibətilə, yeni biznes imkanları açması münasibətilə təbrik etmək istəyirəm.
Cənab Prezident, bu, Sizin 2003-cü il oktyabrın 15-də Azərbaycan Respublikasının Prezidenti seçildikdən sonra Fransaya ilk rəsmi səfərinizdir. Mən elə düşünürəm ki, - bəlkə də səhv edirəm, - bu, Sizin Qərbi Avropaya ilk səfərinizdir. Bu, bizim hamımız üçün, yalnız fransızlar üçün deyil, bütün Qərbi avropalılar üçün çox müsbət mesajdır. Biz, Sizin buraya, MEDEF-ə gəlişinizə böyük hörmətlə yanaşırıq. Sizdən ölkənizin mövqeyi, gələcəyə baxışınız, prioritetləriniz, layihələriniz, dünya iqtisadiyyatına inteqrasiya planınız haqqında eşitmək istəyirik. Buna görə sağ olun. Bir də çox sağ olun ki, bugünkü təqdimatın ingiliscə keçirilməsinə razılıq verdiniz, bu şübhəsiz ki, biznes icmasının üzvləri ilə ünsiyyəti sürətləndirəcək və asanlaşdıracaqdır.
Sonda, razı olsaydınız, biznes icmasının üzvləri Sizə suallarla müraciət edəcəklər.
Cənab Prezident!
Xanımlar və cənablar, diqqətinizə görə çox sağ olun. İndi isə, etiraz etmirsinizsə, bizim xarici ticarət naziri cənab Fransua Loosa söz verək. O, Fransa hökumətinin xarici ticarəti haqqında bizə məlumat versin. Buyurun, cənab nazir.
Bölmənin digər xəbərləri
