Azərbaycan Prezidentinin Tacikistan səfəri ölkələrimiz arasında münasibətləri daha da dərinləşdirəcək
Bakı, 7 aprel, AZƏRTAC
Digər ölkələrin ərazi bütövlüyü və suverenliyi prinsiplərinə hörmətlə yanaşan Azərbaycan xarici siyasətində qonşuları, dünya dövlətləri ilə sıx əməkdaşlıq əlaqələrini dərinləşdirməyi əsas tutur. Siyasətində hər zaman milli maraqlardan çıxış edən ölkəmiz Mərkəzi Asiya ölkələri, o cümlədən türk dövlətləri ilə münasibətlərinə xüsusi önəm verir. Çünki son illər dünyada baş verən proseslər ölkələrdən birgə əməkdaşlıq və ümumi səylər göstərməyi tələb edir.
Mərkəzi Asiya Türkdilli xalqların ana yurdu sayılır. Prezident İlham Əliyevin bu günlərdə dövlət səfərində olduğu Tacikistan bu xalqlar arasında əhalinin sayında ən yüksək təbii artım olan ölkələrdəndir. Ölkələrimiz arasında münasibətlərinin tarixi qədimdir və Prezident İlham Əliyevin qeyd etdiyi kimi, Azərbaycan və Tacikistan arasında münasibətlərin çox yaxşı gələcəyi var. Ölkələrimiz həm ikitərəfli formatda, həm də beynəlxalq məkanlarda sıx əməkdaşlıq edirlər. Ticari-iqtisadi, sənaye kooperasiyası, nəqliyyat sahələrində əlaqələrin dərinləşməsi üçün çox yaxşı perspektivlər mövcuddur. Prezident İlham Əliyevin Tacikistana səfəri və imzalanmış sənədlər onu deməyə əsas verir ki, Azərbaycan və Tacikistan arasında əlaqələr yeni mərhələyə qədəm qoyur.
Bu fikirləri AZƏRTAC-a açıqlamasında Milli Məclisin deputatı Məşhur Məmmədov səsləndirib.
O bildirib ki, dövlətimizin başçısı iki ölkə arasında münasibətlərin daha da genişləndirilməsinin əhəmiyyətini diqqətə çatdıraraq səfərin nəticələrinin uğurlu olacağına əminliyini ifadə edib.
“Taciklərin də farsdilli xalqlar qrupuna daxil olduğuna görə İran həmişə Tacikistanı özünə yaxın və nüfuzunun güclü olduğu bir ölkə hesab edib. Amma faktlar onu göstərir ki, Azərbaycanın İranın özünə yaxın bildiyi Tacikistanla yaxın dostluq və strateji tərəfdaşlıq münasibətləri var. Prezident İlham Əliyevin Tacikistana səfəri ölkələrimiz arasında münasibətlərin daha da dərinləşməsinə təkan verdi.
Səfər çərçivəsində Azərbaycanla Tacikistan arasında mədəniyyət, iqtisadiyyat, kənd təəssüratı, turizm, investisiya və digər sahələrdə əməkdaşlıq haqqında Sazişlərin imzalanması perspektivlərdən xəbər verir”, - deyə M.Məmmədov vurğulayıb.
Tacikistan Prezidenti Emoməli Rəhmonun ölkəmizə, Ulu Öndər Heydər Əliyevə xoş münasibətini qeyd edən deputat bildirib ki, Tacikistan rəhbəri Azərbaycan xalqının böyük oğlu Heydər Əliyevin ən çətin dövrdə ölkəsini fəlakətdən xilas etdiyini, Azərbaycanı sabitlik və inkişaf yoluna çıxardığını vurğuladı. Heydər Əliyevin 100 illiyinin Tacikistanda da qeyd olunacağını diqqətə çatdırdı.
Emoməli Rəhmon Prezident İlham Əliyevin Tacikistana səfərini ölkələrimiz arasında əlaqələrin, xalqlarımızın çoxəsrlik qarşılıqlı ünsiyyət tellərinin məntiqi davamı olduğunu vurğuladı. Tacikistan Prezidenti ölkələrimiz və xalqlarımız arasında əlaqələrin qurulmasında dahi mütəfəkkir Nizami Gəncəvinin rolunu da qeyd etdi.
“Səfər çərçivəsində parlamentlərarası əməkdaşlıq, mədəni, ticarət-iqtisadi əlaqələrin möhkəmləndirilməsi, investisiyalar, sənaye kooperasiyası, kənd təsərrüfatı, nəqliyyat sahələrində və yanacaq-energetika kompleksində qarşılıqlı fəaliyyətin istiqamətləri müzakirə olunmuş, regional və beynəlxalq terrorizmə, ekstremizmə narkotiklərin və silahların qanunsuz dövriyyəsinə, transmilli mütəşəkkil cinayətkarlığa qarşı mübarizədə əməkdaşlığın möhkəmləndirilməsinə dair müzakirələr aparılıb.
Bir sözlə, Prezident İlham Əliyevin Tacikistana dövlət səfəri iki ölkə arasında münasibətlərin dərinləşməsinə böyük töhfə verəcək”, - deyə Məşhur Məmmədov vurğulayıb.
Bölmənin digər xəbərləri
