AZƏRBAYCAN RESPUBLİKASININ PREZİDENTİ ZATİ–ALİLƏRİ CƏNAB İLHAM ƏLİYEVƏ
Atanız Prezident Heydər Əliyevin vəfatı ilə əlaqədar Amerika Ticarət Palatasının bütün üzvləri və kollektivi adından Sizə və ailənizə dərin hüznlə başsağlığı verirəm. Bu faciənin gözlənilməz olmasına baxmayaraq, valideyn itirmək hər kəs üçün, xüsusən də öz çiyinlərində bütün xalqın məsuliyyətini daşıyan Sizin kimi bir şəxs üçün həmişə çətin və ağır olur. Bildirmək istərdik ki, biz Sizin və qəm içində olan bütün Azərbaycan xalqının kədərini bölüşürük.
Prezident Heydər Əliyev Azərbaycan tarixində tutduğu ən yüksək fəxri pilləni həmişə qoruyub saxlayacaqdır. Qafqazı tanıyan hər bir şəxs razılaşar ki, cənab Heydər Əliyev bu regionun tarixində rəhbərlik etmiş ən böyük lider, öz ölkəsini qurmuş və ona yenidən həyat vermiş bir şəxsiyyət olmuşdur.
Şəxsən öz adımdan deyə bilərəm ki, mən səfir olduğum illər ərzində Sizin atanızla yaxından işləmək şərəfinə nail olmuşam. Onun müdrikliyi, peşəkar liderlik qabiliyyəti, beynəlxalq diplomatiyada göstərdiyi ustalıq və Qafqazın siyasi–iqtisadi mürəkkəbliklərini tam başa düşməsi Azərbaycan və Birləşmiş Ştatlar arasında mövcud olan iqtisadi və siyasi münasibətləri möhkəmləndirmiş, ölkədə geniş miqyaslı islahatların həyata keçirilməsinə zəmin yaratmış, Azərbaycanın yaxın və işıqlı gələcəyinin təməlinin qoyulmasında öz əsas rolunu oynamağa imkan vermişdir. Mən bu prosesin xoşbəxt şahidi olmuşam və indi çox kədərlənirəm ki, cənab Heydər Əliyev səylərinin bütün nəticəsini görə bilmədən bizi tərk etdi.
Cənab Prezident, təməli Heydər Əliyev tərəfindən qoyulmuş böyük işləri başa çatdırmaq artıq Sizin üzərinizə düşür. Şəxsən öz adımdan və ABŞ Ticarət Palatası adından tam əminliklə söyləyə bilərəm ki, Sizin atanızın siyasətini bundan sonra da həyata keçirə biləcəksiniz və onun öz ölkəsi ilə bağlı böyük arzusunu reallaşdıracaqsınız. Bu arzunun tərkib hissələrindən biri də Azərbaycanın səmərəli rəqabət əsasında beynəlxalq bazarlarda özünə layiq olan yeri tuta bilməsini təmin etmək məqsədi ilə özəl biznes sektoru üçün əlverişli şəraitin inkişafı olmuşdur. Azərbaycanda fəaliyyət göstərən Amerika Ticarət Palatası bu amala nail olmaq üçün hər zaman Sizin hökumətinizlə işləməyə hazırdır.
Bir daha öz şəxsi ehtiramımı Sizə bildirir və dərin hüznlə başsağlığı verirəm.
Stenli T. Eskudero,
Azərbaycandakı Amerika Ticarət Palatasının
birinci vitse–prezidenti.
16 dekabr 2003-cü il.
Bölmənin digər xəbərləri
