Azərbaycan səfiri etimadnaməsinin surətini Vatikanın Dövlət Katibliyinin əvəzedicisinə təqdim edib
Vatikan, 15 dekabr, AZƏRTAC
Azərbaycanın Müqəddəs Taxt-Tacdakı səfiri İlqar Muxtarov etimadnaməsinin surətini bu ölkənin Dövlət Katibliyinin əvəzedicisi arxiyepiskop Edqar Penya Parraya təqdim edib.
AZƏRTAC xəbər verir ki, görüşdə bu il Azərbaycanla Müqəddəs Tax-Tac arasında diplomatik münasibətlərin qurulmasının 30 illiyinin qeyd olunduğu, ikitərəfli yüksək səviyyəli əməkdaşlığın və dinlərarası əlaqələrin inkişafından məmnunluq ifadə edilib. Arxiyepiskop Edqar Penya Parra Azərbaycanın Müqəddəs Taxt-Tacda səfirliyinin təsis olunmasının əhəmiyyətini vurğulayıb.
O, Azərbaycanın dinlərarası və mədəniyyətlərarası dialoqun təşviqi istiqamətindəki fəaliyyətini xüsusi qeyd edib. Bildirib ki, Azərbaycanın Birinci vitse-prezidenti, Heydər Əliyev Fondunun prezidenti Mehriban Əliyevanın təşəbbüsü ilə Vatikanda və Romada mühüm tarixi əhəmiyyət daşıyan dini abidələr bərpa olunur. Heydər Əliyev Fondunun və şəxsən Azərbaycanın birinci xanımı Mehriban Əliyevanın bəşəriyyət üçün dəyərli əsərlərin qorunması, gələcək nəsillər üçün saxlanılması istiqamətindəki səyləri Vatikanda çox yüksək qiymətləndirilir.
Arxiyepiskop Azərbaycanın Avropanın enerji təhlükəsizliyinə verdiyi töhfəni yüksək qiymətləndirib. Azərbaycan ilə Avropa İttifaqı arasında imzalanan Anlaşma Memorandumunda yalnız qaz təchizatının deyil, elektrik enerjisi və “yaşıl hidrogen” daxil olmaqla, hidrogen təchizatı məsələsinin yer almasının əhəmiyyətini qeyd edib.
Edqar Penya Parra bu ilin əvvəlində Qafqaz Müsəlmanları İdarəsinin sədri şeyxülislam Allahşükür Paşazadənin rəhbərlik etdiyi Azərbaycandakı dini icmaların təmsilçilərindən ibarət nümayəndə heyətinin Müqəddəs Tax-Taca səfərini məmnunluqla xatırladıb. Belə qarşılıqlı səfərlərin Azərbaycan-Vatikan əlaqələrinin inkişafında xüsusi əhəmiyyət daşıdığını bildirib. Deyib ki, Azərbaycan regionda multikultural dəyərlərə sadiq və bu dəyərləri təşviq edən ölkə kimi tanınır.
İlqar Muxtarov multikulturalizm və tolerantlığın Azərbaycan cəmiyyətinin həyat tərzi olduğunu bildirib. İkitərəfli yüksək səviyyəli səfərlərin əhəmiyyətini qeyd edən səfir diqqətə çatdırıb ki, Azərbaycan Müqəddəs Taxt-Tacla əlaqələrin inkişafında maraqlıdır.
Görüşdə Azərbaycan ilə Müqəddəs Taxt-Tac arasında gələcək əməkdaşlıq məsələlərinə dair fikir mübadiləsi aparılıb.
Nihad Budaqov
AZƏRTAC-ın xüsusi müxbiri
Vatikan
Bölmənin digər xəbərləri
