Azərbaycan-Slovakiya əlaqələrinin inkişafında parlamentlərarası əlaqələr mühüm rol oynayır
Bakı, 9 aprel, Aidə Quluzadə, AZƏRTAC
Aprelin 9-da Millli Məclis sədrinin müavini Valeh Ələsgərov ölkəmizdə səfərdə olan Slovakiya Milli Şurasının Slovakiya-Azərbaycan parlamentlərarası dostluq qrupunun üzvlərindən ibarət nümayəndə heyəti ilə görüşüb.
AZƏRTAC xəbər verir ki, görüşdə Valeh Ələsgərov iki ölkə arasındakı dostluq münasibətlərinin olduğunu məmnunluqla qeyd edib. Bildirib ki, son vaxtlar dünyada gedən proseslər fonunda belə münasibətlərin inkişaf etdirilməsi çox böyük əhəmiyyətə malikdir. Milli Məclis sədrinin müavini qonaqlara Azərbaycanın son 10 ildə keçdiyi sürətli inkişaf yolu haqqında məlumat verib. Bildirilib ki, Azərbaycan Cənubi Qafqaz bölgəsində ən güclü iqtisadiyyata malik olan dövlətdir və Avropanın enerji təhlükəsizliyinin təmin edilməsində əhəmiyyətli layihələrin müəllifidir.
Sədr müavini ölkəmizin ağrılı problemi olan Ermənistan-Azərbaycan, Dağlıq Qarabağ münaqişəsinə toxunaraq bu problemin hələ də ədalətli həllini tapmadığını deyib. Təəssüf ki, dünya ictimaiyyəti vaxtında bu problemin həlli istiqamətində qətiyyətli addımlar atmayıb.
Valeh Ələsgərov Slovakiya nümayəndə heyətinin bu səfərini əlaqələrimizin daha da inkişaf etdirilməsi istiqamətində yeni bir mərhələyə qədəm qoyulması kimi qiymətləndirib. O, qonaqlara Bakıda keçiriləcək birinci Avropa Oyunlarına hazırlıqla bağlı görülən işlər barədə də məlumat verib.
Slovakiya-Azərbaycan parlamentlərarası dostluq qrupunun rəhbəri Madey Robert qanunverici orqanların yüksək səviyyəli əlaqələrinin iki ölkə arasındakı münasibətlərin inkişafında oynadığı roldan danışıb. Vurğulanıb ki, müxtəlif sahələrdə əməkdaşlığın daha da gücləndirilməsi üçün yaxşı imkanlar mövcuddur və bundan faydalanmaq lazımdır.
X X X
Sonra nümayəndə heyəti Milli Məclisin Azərbaycan-Slovakiya parlamentlərarası əlaqələr üzrə işçi qrupunun üzvləri ilə görüşüb.
İşçi qrupun rəhbəri Şəmsəddin Hacıyev ölkələrimiz arasındakı tarixi əlaqələrdən danışıb. Qeyd edib ki, xüsusilə Azərbaycan müstəqilliyini bərpa etdikdən sonra bu münasibətlər yeni müstəvidə inkişaf etməyə başlayıb. Beynəlxalq təşkilatlar çərçivəsində uğurlu əməkdaşlıqdan danışan Ş.Hacıyev iqtisadi əlaqələrin daha da inkişaf etdirilməsinin vacibliyini vurğulayıb, bunun üçün kifayət qədər potensialın olduğunu söyləyib. O, qarşılıqlı səfərlərin əlaqələrin daha da inkişaf etdirilməsində rolunu qeyd edib.
Ş.Hacıyev Ermənistan-Azərbaycan, Dağlıq Qarabağ probleminin ədalətli həllinə nail olunması istiqamətində Azərbaycanın haqlı mövqeyini dəstəklədiyinə görə Slovakiya parlamentinə təşəkkür edib.
Madey Robert Azərbaycanın sürətli inkişafının yüksək qiymətləndirildiyini söyləyib və ölkələrimiz arasında iqtisadi, təhsil, turizm və digər sahələrdə əlaqələrin inkişafı, həmçinin parlamentlərarası münasibətlərin dərinləşdirilməsi üçün yaxşı imkanların olduğunu diqqətə çatdırıb.
Bölmənin digər xəbərləri
