Azərbaycan Turizm İnstitutunun rektoru “Skal Bakı” təşkilatının prezidenti kimi fəaliyyətə başlamışdır
Bakı, 24 yanvar (AZƏRTAC). Yanvarın 24-də “Jumeirah Bilgah Beach Hotel”də “Skal Bakı” (Səyahət və Turizm Peşəkarları Beynəlxalq Assosiasiyası - Skal İnternational”ın Bakı klubu) təşkilatının 15-ci toplantısı keçirilmişdir.
AZƏRTAC xəbər verir ki, toplantı çərçivəsində Azərbaycan Turizm İnstitutunun (ATİ) rektoru, professor Cəfər Cəfərovun “Skal Bakı”nın prezidenti kimi fəaliyyətə başlaması münasibətilə andiçmə mərasimi keçirilmişdir.
Tədbirdə “Skal Bakı”nın sabiq prezidenti Ruslan Quliyev təşkilatın fəaliyyəti, qazandığı uğurlardan danışmışdır.
Bildirmişdir ki, təşkilatın 14-cü toplantısında professor Cəfər Cəfərov üzv iştirakçıların yekdil səsini qazanaraq, qurumun yeni prezidenti seçilmişdir.
Cəfər Cəfərov bütün “Skal Bakı” nümayəndələrinə bu məsuliyyətli və şərəfli işdə ona göstərdikləri etimada görə minnətdarlığını bildirmişdir. O, vəzifəsini turizm sektoru təmsilçilərinin köməyi ilə layiqincə yerinə yetirəcəyini və Azərbaycan turizminin təbliğinə yönələn yeni imkanların və vasitələrin yaradılmasına xidmət edəcəyini vurğulamışdır.
Bakı klubunun yaranmasında, fəaliyyətində Ruslan Quliyevin və klubun digər əməkdaşlarının xidmətlərini yüksək qiymətləndirən Cəfər Cəfərov bu nümayəndəliyin qısa müddətdə dairəsini genişləndirdiyini söyləmişdir.
“Skal Bakı” ofisinin prezidenti vəzifəsində görüləcək işlər barədə məlumat verən Cəfər Cəfərov bildirmişdir ki, məqsədimiz ATİ-də turizm sektoru üçün əsl peşəkar kadrların yetişdirilməsi, yeni peşəkarlar və “Skal Bakı” ofisi arasında şəbəkənin yaradılmasıdır. Bu nümayəndəlik artıq ATİ ilə fəal əməkdaşlıq əlaqələri qurmuşdur.
Tələbələrimiz “Bakı Skal” tərəfindən keçirilən məruzələrdə iştirak edirlər. Yerli turizmin nəinki Bakıda, onun ətrafında və bölgələrdə inkişafı, daxili turizmin perspektivləri, yeni turizm marşrutlarının açılması, yerli əhalinin turizm istiqamətində maarifləndirilməsi qarşıda duran əsas məqsədlərimizdir. İnanıram ki, bu sahədə bizə turizm sahəsinin yeni peşəkarları olan ATİ-nin məzunları yardım edəcəklər. Digər məqsədimiz “Skal İnternational” yolu ilə Azərbaycana gələn turizm sektorunun peşəkarlarının ATİ-nin tələbələri üçün turizmdə nəqliyyat, tarixi abidələrin qorunub saxlanması və onların təbliği, turizm biznesi üçün təhlükəsizlik şəraitinin yaradılması və digər mövzular ətrafında məruzələrin və kursların təşkilidir. Bundan əlavə, İstanbul, Madrid və dünyanın digər ölkələrində yerləşən “Skal İnternational”ın ofisləri ilə əlaqələrin genişləndirilməsidir.
“Skal Bakı” klubunun vitse-prezidenti Ceyhun Aşurov, klubun idarə heyətinin üzvü Rəhim Hüseynov, Avstriyanın Krems Tətbiqi Elmlər Universitetinin müəllimi, “Skal Vyana” klubunun prezidenti Mario Rehulka dünyanın nüfuzlu təşkilatı olan “Skal İnternational”ın və Bakı ofisinin fəaliyyəti və qazandığı uğurlardan danışmışlar.
Bildirilmişdir ki, 1934-cü ildə yaradılan “Skal İnternational”ın əsas məqsədi dünyada turizm sahəsində dostluq əhvalını yaratmaqdan və qoruyub saxlamaqdan ibarətdir. Hazırda qurum 20 minədək üzvü birləşdirir. Dünyanın bir çox ölkələrində turizm sektorunun həqiqi peşəkarlarını birləşdirən Skal klubları fəaliyyət göstərir. Skalın Bakıdakı klubu MDB ölkələri arasında ilk açılan nümayəndəlikdir.
Sonra Ruslan Quliyev klubun prezidentlik simvolunu Cəfər Cəfərova təqdim etmiş və yeni prezident and içmişdir.
Bölmənin digər xəbərləri
