Azərbaycanın Bosniya və Herseqovina ilə əməkdaşlığı iki region üçün faydalı olacaq
Bakı, 15 aprel, AZƏRTAC
Azərbaycan Prezidenti İlham Əliyevin Bosniya və Herseqovinaya rəsmi səfəri və bu çərçivədə strateji tərəfdaşlıq haqqında Bəyannamənin imzalanması ikitərəfli münasibətləri tamamilə yeni səviyyəyə yüksəltməklə yanaşı, həm də iki region - Cənubi Qafqaz və Balkanlar arasında sıx əlaqələrin inkişafının əsasını qoyub. Bu hadisə bir daha sübut etdi ki, Azərbaycan Cənubi Qafqazda aparıcı rola malikdir.
Azərbaycanın Rus İcması sədrinin birinci müavini, siyasi icmalçı Anastasiya Lavrina AZƏRTAC-a bildirib ki, Azərbaycan və Bosniya və Herseqovina ötən yüzilliyin 90-cı illərində ciddi siyasi sarsıntılar keçiriblər. Hər iki ölkə müstəqil siyasət aparılması prinsiplərini rəhbər tutaraq inkişaf yoluna qədəm qoya bilib. 2020-ci ilin payızında Ermənistanla Azərbaycan arasında Qarabağ münaqişəsinin nizama salınması Cənubi Qafqaz üçün yeni perspektivlər və imkanlar açıb. Təəccüblü deyil ki, Prezident İlham Əliyev birgə mətbuat konfransında ərazi bütövlüyü, suverenlik və sərhədlərin toxunulmazlığı məsələlərində iki ölkənin qarşılıqlı dəstəyini bəyan edib.
A.Lavrina deyib: “Liderin və onun ölkəsinin ən mühüm keyfiyyətlərindən biri etibarlılıq və verilən sözə sadiq olmaqdır. Azərbaycanın lideri öz fəaliyyəti ilə beynəlxalq aləmdə ölkəmizin etibarlı tərəfdaş kimi tanınmasına nail olub. Azərbaycan koronavirus dövründə ilk dəfə vaksin milliyyətçiliyi ilə mübarizəni gündəmə gətirib. Biz enerji böhranı ilə üzləşən Avropanı dəstəklədik. Bu gün Prezident İlham Əliyev daha ədalətli dünyanın formalaşması üçün yüksək kürsülərdən BMT TŞ-də islahatların zəruriliyindən danışır. Bütün bunlar mühüm məsələlər üzrə qlobal liderliyi öz üzərinə götürən Azərbaycanı bir çox ölkələr üçün mühüm tərəfdaşa çevirib”.
Siyasi icmalçı xatırladıb ki, Azərbaycanın dövlət başçısı səfər zamanı Orta Dəhliz çərçivəsində infrastruktur layihələrinə - Cənubi Qafqaz və Balkan regionları arasında nəqliyyat əlaqəsinə də toxunub. “Artıq bir çox ölkələr, o cümlədən güclü dövlətlər Orta Dəhlizin həyata keçirilməsində Azərbaycanın rolunu qiymətləndirib. Düşünürəm ki, Azərbaycanın Bosniya və Herseqovina ilə əməkdaşlığı bir sıra infrastruktur layihələrinin reallaşmasına töhfə verəcək. Onu da unutmaq olmaz ki, Balkan yarımadası və Şərqi Avropa ölkələri Azərbaycan qazına ehtiyac duyur. Ölkəmiz bu məsələdə də dəstəyini verməyə hazırdır. İki ölkə təhlükəsizlik sahəsində də əməkdaşlıq etmək niyyətindədir. Qeyd etmək lazımdır ki, Azərbaycan Prezidenti rəsmi səfərindən bir az əvvəl Bakıda Bosniya və Herseqovinanın təhlükəsizlik nazirinin başcılıq etdiyi nümayəndə heyətini qəbul edib.
Azərbaycan başqa ölkələr üçün bərabərhüquqlu tərəfdaş qismində çıxış edir; ölkəmiz kimsədən yardım istəmir, şikayət etmir, öz müstəqilliyini və obyektiv mövqeyini nümayiş etdirir. Bununla belə, Azərbaycana lazım olan anda başqalarının köməyinə gəlmək bacarığı xasdır. Təsadüfi deyil ki, Bosniya və Herseqovinanın Rəyasət Heyətinin Sədri Jelka Tsviyanoviç 2014-cü ildə sel və daşqınlar zamanı, habelə COVID-19 dövründə Azərbaycanın dəstəyini xatırladıb.
A.Lavrina hesab edir ki, iki ölkəni birləşdirən daha bir amil çoxkonfessiyalılıq və multikulturalizmdir. Ölkələrimizdə müxtəlif etnik qrupların mövcudluğu və onların dinc yanaşı yaşaması üçün yaradılan şərait bir çox hallarda iki xalqın sabitliyi və tərəqqisini təmin edir. Buradan belə bir qənaət hasil olur ki, Azərbaycan və Bosniya və Herseqovina bir neçə istiqamətlər üzrə əməkdaşlığı inkişaf etdirmək və möhkəmləndirmək niyyətindədir və bu, iki region üçün faydalı olacaq.
Bölmənin digər xəbərləri
