Azərbaycanın qaçqınları və məcburi köçkünləri: itki və tələfatların qiymətləndirilməsi media müstəvisində
Bakı, 22 aprel, AZƏRTAC
Aprelin 22-də Azərbaycan Respublikası ərazilərinin Ermənistan silahlı qüvvələri tərəfindən işğalı nəticəsində məruz qalınan itki və tələfatların qiymətləndirilməsi üzrə İşçi Qrupu Mətbuat Şurası ilə birgə “Azərbaycanın qaçqınları və məcburi köçkünləri: itki və tələfatların qiymətləndirilməsi media müstəvisində” mövzusunda “dəyirmi masa” keçirib.
AZƏRTAC xəbər verir ki, Azərbaycan Sosial Rifah Partiyasının sədri, Milli Məclisin deputatı, İşçi Qrupun rəhbəri Xanhüseyn Kazımlı Ermənistanın yürütdüyü işğalçılıq siyasəti ilə ölkəmizə vurduğu ziyanın qiymətləndirilərək beynəlxalq təşkilatlar qarşısında təqdimatların keçirilməsinin zəruriliyini qeyd edib. O bildirib ki, Ermənistanın Azərbaycana qarşı işğalçılıq siyasəti ölkəmizə böyük miqdarda zərər vurmaqla yanaşı, Cənubi Qafqaz regionunda sülhün pozulmasına gətirib çıxarıb. İşğal nəticəsində çoxçeşidli təbii sərvətlərimiz, fauna və floramız ermənilər tərəfindən talan edilib. Bu kimi təcavüz hallarının cəzasız qalması və ikili standartlar hazırda dünyanın əziyyət çəkdiyi terrorizmin artmasına rəvac verib.
Qeyd edilib ki, Azərbaycan Prezidenti tərəfindən qarşıya qoyulan vəzifələrin həllinə nail olmaq üçün Avrasiya Qiymətləndiricilər Birlikləri Assosiasiyası qarşısında hələ 2014-cü ildə münaqişə, müharibə və tələfatlara görə itkilərin hesablanması üzrə beynəlxalq standartların qəbul edilməsi barədə məsələ qaldırılıb. Azərbaycan nümayəndə heyətinin həmin beynəlxalq qurumun üzvü olaraq qaldırdığı məsələ hələ bir il bundan əvvəl qəbul edilib. Həmin standartların layihəsinin hazırlanması Azərbaycan tərəfinə həvalə olunub. Təsdiq ediləcək bu standartlar əsasında məruz qaldığımız itki və tələfatların hesablanması prosesi son mərhələyə çatacaq.
Mətbuat Şurasının sədri Əflatun Amaşov qondarma erməni soyqırımından danışaraq bildirib ki, əslində 1918-ci ildə azərbaycanlılar soyqırımına məruz qalıb: “Belə bir məqamda mən diqqəti ikili standartlara yönəltmək istəyirəm. Xocalı hadisələrinə, azərbaycanlı qaçqın və məcburi köçkünlərin qarşılaşdığı problemlərə dünya ictimaiyyəti biganə yanaşır. Düzdür, ermənilər qondarma soyqırımı ilə bağlı bir əsrdən çoxdur təbliğat işi aparırlar. Ancaq Azərbaycan da özünün qarşılaşdığı həqiqətlərlə bağlı qısa zaman ərzində böyük işlər görüb. İşçi Qrupunun da bu sahədə böyük uğurları var. Apardığımız araşdırmalar göstərir ki, Azərbaycan mətbuatı bu sahəyə daha çox diqqət ayırır”.
“Dəyirmi masa”da İctimai Televiziya və Radio Yayımları Şirkətinin Yayım Şurasının sədri, Bakı Dövlət Universitetinin (BDU) jurnalistika fakültəsinin professoru Cahangir Məmmədli, Milli Məclisin deputatı Hüseynbala Mirələmov, BDU-nun jurnalistika fakültəsinin dekanı, professor Şamil Vəliyev, “Xalq qəzeti”nin əməkdaşı Tahir Aydınoğlu, İşçi Qrupun üzvləri və başqaları çıxış edərək Ermənistanın Azərbaycanın ərazilərini işğal etməsi nəticəsində dəymiş maddi və mənəvi ziyandan danışıb, bu barədə cəmiyyətin və beynəlxalq qurumların məlumatlandırılmasının zəruriliyini vurğulayıblar.
Bölmənin digər xəbərləri
