Azərbaycanlı alim Parisdə çayların çirkləndirilməsi ilə bağlı məruzə ilə çıxış edəcək
Bakı, 23 noyabr, Ramiz Quliyev, AZƏRTAC
Beynəlxalq Ekoenergetika Akademiyasının prezidenti, professor Fəqan Əliyev noyabrın 25-də Parisdə keçiriləcək iqlim məsələlərinə həsr edilmiş sammitdə iştirak edəcək.
Fəqan Əliyev AZƏRTAC-a müsahibəsində bildirib ki, sammitdə ətraf mühit və risklərin öyrənilməsi, su problemi, havanın çirklənməsi kimi müasir dövrün aktual problemləri müzakirə olunacaq.
Azərbaycanda səth sularının, çayların çirkləndirilməsi, qonşu respublikalar tərəfindən atılan kimyəvi və zərərli tullantılarla bağlı məruzə ilə çıxış edəcəyini planlaşdıran F.Əliyev vurğulayıb ki, Ermənistanın Azərbaycanla sərhədində inşa etdiyi mis zavodunun bütün kimyəvi tullantıları Araz çayı vasitəsilə respublikamıza axıdılır. “Biz Azərbaycanın şah damarı olan Kür və Araz çaylarını qorumalıyıq. Suları çirkləndirmək çox böyük fəlakətlərə gətirə bilər”,- deyən F.Əliyev bildirib ki, son illər dövlət səviyyəsində problemin qarşısının alınması istiqamətində məqsədyönlü tədbirlər görülür.
Alimin sözlərinə görə, Paris sammitində iştirak Azərbaycanın problemlərini dünya ictimaiyyətinə çatdırmaq, respublikada görülən işlərlə bağlı məlumat vermək baxımından mühüm əhəmiyyət kəsb edir.
Bölmənin digər xəbərləri
