Azərbaycanlı hakim U-17 Avropa çempionatının final mərhələsində oyunları idarə edəcək
Bakı, 10 iyul, AZƏRTAC
Voleybol üzrə beynəlxalq dərəcəli hakimimiz Zaur Hacıyev Avropa Voleybol Konfederasiyası (CEV) tərəfindən növbəti dəfə təyinat alıb.
AZƏRTAC Azərbaycan Voleybol Federasiyasına istinadla xəbər verir ki, ədalət təmsilçimiz Serbiya və Macarıstanda keçiriləcək qızlar arasında U-17 Avropa çempionatının final mərhələsində oyunları idarə edəcək hakimlərdən biri olacaq.
İyulun 11-23-də keçiriləcək qitə birinciliyində 16 komanda mübarizə aparacaq. Birinci qrupun oyunları Serbiyanın Vrnjaçka Banja şəhərində, ikinci qrupun oyunları isə Macarıstanın Bekescsaba şəhərində keçiriləcək.
CEV-in təyinatına əsasən, həmyerlimiz Z.Hacıyev ikinci qrupun oyunlarına təyinat alıb. Bu qrupda meydan sahibləri ilə yanaşı, Belçika, Fransa, Almaniya, Yunanıstan, Rumıniya, Sloveniya və Türkiyə yer alıb. Birinci qrupda isə Bolqarıstan, Xorvatiya, Estoniya, Gürcüstan, İtaliya, Polşa, Serbiya və Niderland yarışacaq.
Birincilikdə yarımfinallar iyulun 22-də baş tutacaq. Çempionun adı isə iyulun 23-də bəlli olacaq.
Bölmənin digər xəbərləri
