“Azəriqaz”: Döyüşlərin getdiyi rayonlar üzrə 70 faiz abonentin təbii qaz təchizatı təmin olunur
Bakı, 8 oktyabr, AZƏRTAC
Döyüşlərin getdiyi rayonlar üzrə ümumilikdə 70 faiz abonentin təbii qaz təchizatı təmin edilir.
“Azəriqaz” İstehsalat Birliyindən AZƏRTAC-a bildirilib ki, oktyabrın 8-də səhər saatlarında düşmənin atdığı mərmi Goranboy rayonu, Ağcakənd qəsəbəsində diametri 76 millimetr olan qaz xəttini zədələyib və bunun nəticəsində bir küçənin qaz təchizatı məhdudlaşdırılıb.
Hazırda Füzuli rayonu üzrə 34 yaşayış məntəqəsi təbii qazla təchiz olunur, yalnız 6 yaşayış məntəqəsinin qaz təchizatı məhdudlaşdırılıb. Ağcabədi rayonu üzrə ümumi yaşayış məntəqələrinin yarısı qazla tam təmin edilir. Ağdam rayonu üzrə isə cəmi 6 yaşayış məntəqəsi təbii qazla təchiz olunub, digərlərində məhdudlaşdırma var.
Beyləqan və Bərdə rayonları tam olaraq təbii qazla təmin edilib. Tərtər rayonu tam olaraq və Goranboy rayonunun Tapqaraqoyunlu kəndinin qaz təchizatı təhlükəsizlik tədbiri olaraq hələlik bərpa olunmayıb.
Qeyd edək ki, döyüşlərin getdiyi rayonlar üzrə (Tərtər Regional qaz istismarı İdarəsinin xidmət sahəsi) ümumilikdə 70 faiz abonentin qaz təchizatı təmin edilir, 30 faiz abonentin isə qazla təchizatında məhdudiyyətlər qalmaqdadır.
Bölmənin digər xəbərləri
