İQTİSADİYYAT
“Azərişıq”: Bayram günlərində elektrik enerjisi ilə təchizatda heç bir problem olmayıb
Bakı, 4 yanvar, AZƏRTAC
Bakıda və Azərbaycanın regionlarında bayram günlərində elektrik enerjisi ilə təchizatda heç bir problem olmayıb.
“Azərişıq” ASC-nin mətbuat xidmətindən AZƏRTAC-a bildirilib ki, bu, Prezident İlham Əliyevin qarşıya qoyduğu vəzifə əsasında ölkənin elektrik enerjisi şəbəkəsində son illər həyata keçirilən əsaslı yenidənqurma, infrastrukturun yenilənməsi istiqamətində görülmüş sistemli işlərin bilavasitə nəticəsidir.
“Azərişıq” ASC bayram günləri ərzində gücləndirilmiş iş rejimində işləyib və elektrik enerjisi ilə təchizat baxımından problemlərlə bağlı daxil olan bütün müraciətlərə çevik reaksiya verib.
Bayram günləri ərzində “Azərişıq” ASC-nin 199 saylı “Cağrı mərkəzi”nə 48 fərdi müraciət daxil olub. Əməkdaşlar operativ qaydada həmin ünvanlara baş çəkərək, müraciətlər əsasında lazım olan tədbirləri görüblər. O cümlədən bayram günləri ərzində ölkənin qış turizmi bölgələrində elektrik enerjisi təchizatının fasiləsiz təmin edilməsi üçün bütün ehtiyat tədbirləri görülüb. Nəticədə bu bölgələrin də elektrik təchizatında heç bir problem qeydə alınmayıb və bu da bölgələrə axın edən yerli, xarici turistlərin istirahətinin yüksək səviyyədə təmin olunmasına öz töhfəsini verib.
Bölmənin digər xəbərləri
