ELM VƏ TƏHSİL
Bakı Ali Neft Məktəbində Xocalı soyqırımı qurbanları anılıb
![](/files/galleryphoto/2021/1/1200x630/1614333711174402524_1200x630.jpg)
![](/files/galleryphoto/2021/1/1200x630/16143337111576543049_1200x630.jpg)
Bakı, 26 fevral, AZƏRTAC
Xocalı soyqırımının ildönümü ilə əlaqədar Bakı Ali Neft Məktəbinin (BANM) rəhbərliyi “Ana fəryadı” abidəsini ziyarət edib. Daha sonra Xocalı soyqırımının 29-cu ildönümünə həsr olunmuş onlayn anım tədbiri keçirilib.
BANM-dən AZƏRTAC-a bildirilib ki, tədbir iştirakçıları Xocalı soyqırımı qurbanlarının xatirəsini bir dəqiqəlik sükutla yad ediblər.
Bakı Ali Neft Məktəbinin rektoru Elmar Qasımov bildirib ki, Azərbaycan Respublikasının Prezidenti, Ali Baş Komandan İlham Əliyevin rəhbərliyi ilə şanlı Azərbaycan Ordusu 44 günlük Vətən müharibəsində düşmən tapdağında olan ərazilərimizi işğaldan azad etdi. Bununla da, Xocalı soyqırımı qurbanlarının, həmçinin digər şəhidlərimizin qisası alındı.
Tədbirdə Qafqazşünaslıq İnstitutunun direktor müavini, tarix üzrə fəlsəfə elmləri doktoru Ramilə Dadaşova, Bakı Ali Neft Məktəbinin İngilis dili və humanitar fənlər mərkəzinin dosenti, tarix üzrə fəlsəfə doktoru Ələmdar Şahverdiyev Xocalı soyqırımının tarixi təfərrüatları ilə bağlı tədbir iştirakçılarına məlumat veriblər.
1992-ci il fevral ayının 25-dən 26-na keçən gecə ermənilərin Azərbaycan xalqına qarşı törətdikləri kütləvi cinayətlərdən Xocalı soyqırımının antibəşəri mahiyyəti, faciənin miqyası, qəddarlığı və amansızlığı ilə seçildiyi diqqətə çatdırılıb. Qeyd edilib ki, Xocalı soyqırımının beynəlxalq aləmdə tanınması Azərbaycan Respublikasının xarici siyasətinin əsas istiqamətlərindən biri kimi müəyyənləşdirilib. “Xocalıya ədalət!” beynəlxalq kampaniyası çərçivəsində görülən işlər nəticəsində Xocalı soyqırımı haqqında dünya ictimaiyyəti daim məlumatlandırılır və müxtəlif dövlətlər tərəfindən faciəyə beynəlxalq hüquqi qiymət verilir.
Tədbir iştirakçıları Ermənistan Respublikasının Xocalı soyqırımında olduğu kimi, 44 günlük Vətən müharibəsi dövründə də insanlıq əleyhinə cinayətlərini davam etdirdiyini vurğulayıblar.
Daha sonra Xocalı soyqırımını və Vətən müharibəsində düşmənin məğlubiyyətini əks etdirən videoçarx nümayiş olunub.
Xatırladaq ki, Xocalı soyqırımı zamanı 613 nəfərin - 106 qadın, 63 uşaq, 70 qocanın həyatına son qoyulub, 1000-dən çox dinc sakin ağır yaralanaraq əlil olub, 1275 nəfər girov götürülüb. Onlardan 150 nəfərin taleyi indiyədək məlum deyil. Həmin kütləvi qırğın həyata keçirilərkən 8 ailə bütünlüklə məhv edilib, 25 uşaq hər iki valideynini, 130 uşaq isə valideynlərindən birini itirib.