BAKIDA AVROPA AZƏRBAYCANLILARI KONQRESİNİN II QURULTAYI KEÇİRİLMİŞDİR
AZƏRTAC xəbər verir ki, martın 10-da Bakıda Avropa Azərbaycanlıları Konqresinin II qurultayı keçirilmişdir. Konqresin sədri Bahəddin Kaya tədbiri açaraq, I qurultaydan keçən dövr ərzində görülmüş işləri barədə hesabat vermişdir. O bildirmişdir ki, təşkilatı yaratmaqdan məqsəd Avropada pərakəndə fəaliyyət göstərən Azərbaycan diaspor təşkilatlarını, icma və birliklərini bir araya gətirmək olmuşdur. Konqres Almaniyada rəsmi qeydiyyatdan keçərək, qanuni fəaliyyət göstərir. Ötən 3 il ərzində Konqresə daxil olan təşkilatların sayı 40-a çatmışdır. Bahəddin Kaya Azərbaycan və türk diaspor təşkilatları rəhbərlərinin I forumunun iştirakçılar tərəfindən yüksək dəyərləndirildiyini bildirmiş və bu tədbirin AAK-ın qarşısında böyük məsuliyyət qoyduğunu vurğulamışdır. O demişdir ki, forumun və qurultayın Bakıda keçirilməsi soydaşlarımızın doğma vətənləri ilə bağlılığını daha da artırır, qarşılaşdıqları problemlərin həllində onlara yeni ruh, güc və qüvvət verir.
Xarici Ölkələrdə Yaşayan Azərbaycanlılarla İş üzrə Dövlət Komitəsinin sədri Nazim İbrahimov qurultayın işində Avropanın 30-dan çox ölkəsində fəaliyyət göstərən 84 Azərbaycan diaspor təşkilatından 139 nümayəndənin iştirak etdiyini bildirmişdir. Komitə sədri bunu soydaşlarımızın tədbirə verdiyi önəmin göstəricisi kimi qiymətləndirmiş və qurultayın işinə uğurlar arzulamışdır.
Sonra qurultayın rəyasət heyəti seçilmiş və çıxışlar olmuşdur.
Azərbaycan Respublikası Prezidentinin İcra Aparatının ictimai siyasi məsələlər şöbəsinin müdiri Əli Həsənov çıxışında dünyanın müxtəlif ölkələrində yaşayan, fəaliyyət göstərən azərbaycanlıların bir araya gətirilməsində ümummilli liderimiz Heydər Əliyevin əvəzsiz xidmətlərindən danışmış, məhz ulu öndərimizin şəxsi təşəbbüsü ilə hər il dekabrın 31-nin Dünya azərbaycanlılarının həmrəyliyi günü elan olunduğunu, 2001-ci ildə Bakıda dünya azərbaycanlılarının ilk qurultayının keçirildiyini xatırlatmışdır. Eyni zamanda, Prezident İlham Əliyevin bu sahəyə xüsusi diqqət yetirdiyini bildirmiş və martın 9-da Bakıda keçirilmiş Azərbaycan və türk diaspor təşkilatları rəhbərlərinin I forumunun buna əyani sübut olduğunu vurğulamışdır. O demişdir ki, Azərbaycan dövləti xarici ölkələrdə yaşayan soydaşlarımızla əlaqələrə böyük əhəmiyyət verir. Bu qurultaydan sonra qitələr üzrə mükəmməl diaspor təşkilatlarının formalaşması işi daha da sürətləndiriləcəkdir. Hazırda ABŞ-da belə bir konqresin yaradılması prosesi davam edir. Sonra Asiya qitəsində iş aparılacaqdır.
Ə.Həsənov Azərbaycan və türk diaspor təşkilatlarının birgə fəaliyyət göstərəcəyinə, AAK-ın qarşıya qoyulmuş məqsədə çatmaqda səmərəli işlər görəcəyinə ümidvar olduğunu bildirmiş və qurultayın işinə uğurlar arzulamışdır.
Qurultay nümayəndələrinin çıxışlarında bildirilmişdir ki, hazırda dünyanın bir çox bölgələrində, o cümlədən Avropa ölkələrində fəaliyyət göstərən Azərbaycan və türk diaspor təşkilatları üçün tarixi bir fürsət yaranmışdır. Bundan sonra lobbiçilik işində əhəmiyyətli dönüş başlanacaq, ermənilərin azərbaycanlılara və türklərə qarşı apardıqları çirkin siyasətin qarşısının alınmasında yeni güc yaranacaqdır.
Qurultayda AAK-ın Avropadakı diaspor fəaliyyətinin genişləndirilməsi, buradakı soydaşlarımızın ideya-siyasi birliyinin daha da gücləndirilməsi, qitədəki Azərbaycan dərnəkləri, icmaları, federasiyaları və digər diaspor təşkilatlarının fəaliyyətinin əlaqələndirilməsi imkanlarının artırılması məsələləri geniş müzakirə olunmuş, Ermənistan-Azərbaycan, Dağlıq Qarabağ münaqişəsinin həllində ölkəmizin ədalətli mövqeyinin Avropanın aparıcı dövlətləri tərəfindən dəstəklənməsi və bu sahədə ciddi addımların atılması ilə bağlı təkliflər səslənmişdir. Azərbaycan icmalarının türk diasporu ilə əməkdaşlıq imkanları, Avropada Azərbaycan lobbisinin yaradılması istiqamətində görüləcək tədbirlər, AAK-ın digər regionlardakı federasiya və təşkilatlarla əlaqələrinin qurulması, qurumun operativ idarə olunması məqsədi ilə daimi qərargahın yaradılması və digər məsələlər də diqqət mərkəzində olmuşdur.
Qurultayın sonunda təşkilati məsələyə baxılmış, Ümumrusiya Azərbaycan Konqresinin vitse-prezidenti Natiq Ağamirov AAK-ın yeni prezidenti seçilmişdir. Avropa Azərbaycanlıları Konqresi Mərkəzi Şurasının 101 nəfərdən ibarət yeni tərkibi, AAK-ın regionlar üzrə birinci vitse-prezidentləri, vitse-prezidentləri, 27 nəfərdən ibarət İcraiyyə Komitəsi seçilmiş, qətnamə qəbul olunmuşdur.
Qurultay iştirakçıları adından Azərbaycan Prezidenti İlham Əliyevə müraciət, habelə Ermənistan-Azərbaycan, Dağlıq Qarabağ münaqişəsi ilə bağlı beynəlxalq təşkilatlara müraciət qəbul edilmişdir.
Bununla da qurultay başa çatmışdır.
Bölmənin digər xəbərləri
