Bakıda INTOSAI-nin Maliyyə Auditi və Mühasibatlıq üzrə alt komitəsinin illik toplantısı keçirilir
Bakı, 30 avqust, AZƏRTAC
Avqustun 30-da Bakıda Azərbaycan Respublikası Hesablama Palatasının ev sahibliyi ilə INTOSAI-nin Maliyyə Auditi və Mühasibatlıq üzrə alt komitəsinin illik toplantısı işə başlayıb.
AZƏRTAC xəbər verir ki, toplantıdan öncə tədbir iştirakçıları Fəxri xiyabanda xalqımızın Ümummilli Lideri Heydər Əliyevin əziz xatirəsini ehtiramla yad edib, məzarı önünə əklil qoyub, güllər düzüblər. Sonra Şəhidlər xiyabanına gedərək ölkəmizin müstəqilliyi, ərazi bütövlüyü uğrunda canlarından keçmiş qəhrəman Vətən övladlarının xatirəsini yad edib, məzarları önünə gül dəstələri qoyublar.
Tədbirdə əvvəlcə Ulu Öndər Heydər Əliyevin 100 illik yubileyi ilə əlaqədar dahi rəhbərin həyat və fəaliyyətini əks etdirən film nümayiş olunub.
Daha sonra tədbiri açan Hesablama Palatasının auditoru Hilal Hüseynov alt komitənin gördüyü işlər barədə ümumi məlumat verib, maraqlı tərəflərin dövlət sektorundan gözləntilərindən, dövlət maliyyəsinin idarə edilməsinin modernizasiyasından, o cümlədən uçot və hesabatlılıq sahəsində aparılan islahatların audit sahəsində əhəmiyyətli dəyişikliklərə təkan verməsindən bəhs edib.
Bildirib ki, INTOSAI-nin Maliyyə Auditi və Mühasibatlıq üzrə alt komitəsi maliyyə auditi və mühasibatlıq fəaliyyətinin keyfiyyətinin artırılmasına töhfə verən ekspert qrupudur. Bu qrupun toplantılarında dünyanın müxtəlif regionlarından olan ölkələrin ali audit orqanları ilə yanaşı, bir sıra nüfuzlu beynəlxalq qurumlar da iştirak edirlər: “Azərbaycan Respublikasının Hesablama Palatası olaraq ötən il illik toplantıda iştirak etməklə müşahidəçi qismində alt komitəyə qəbul edilmişik. Alt komitəyə üzvlükdə əsas məqsədlərimizdən biri də dövlət maliyyə idarəedilməsi sahəsində baş verən dəyişikliklərə adekvat şəkildə fəaliyyətimizin qurulması, yeniliklərin yaxından izlənilməsi və buna müvafiq addımların atılmasıdır. Məlum olduğu kimi, dövlət idarəetməsində islahatların həyata keçirilməsi, maraqlı tərəflərin dövlət sektorundan gözləntiləri bir sıra ölkələrdə dövlət maliyyəsinin idarəedilməsinin modernizasiyasını, o cümlədən uçot və hesabatlılıq sahəsində beynəlxalq standartlara uyğun harmonizasiyanı labüd etmişdir”.
Diqqətə çatdırılıb ki, uçot və hesabatlılıq sahəsində aparılan islahatlar audit sahəsində də əhəmiyyətli dəyişikliklərə təkan vermişdir. Belə ki, dövlət sektorunda hesablama əsaslı uçotu, büdcəni tətbiq edən, ilin sonuna maliyyə hesabatlarını bu əsasla təqdim edən ölkələrin Ali Audit Orqanlarının (AAO) fəaliyyəti də yeni çağırışların tələbləri nəzərə alınmaqla inkişaf etməkdədir. Bu islahatlar qısamüddətli dövrdə ayrı-ayrı qurumlar tərəfindən maliyyə hesabatlarının beynəlxalq standartlara uyğun hazırlanması və həmin hesabatlara AAO tərəfindən rəy verilməsi ilə başlayır. Uzunmüddətli dövrdə isə dövlət büdcəsinin, bəzi hallarda dövlət maliyyəsinin bütün komponentləri üzrə konsolidə edilmiş maliyyə hesabatlarının hazırlanması və buna AAO tərəfindən rəy verilməsi ilə davam edir.
“Ölkəmizdə də son illərdə dövlət maliyyəsinin idarəedilməsində aparılan islahatlar uçot və hesabatlılıq sahəsini də əhatə etmişdir. Burada xüsusilə “Mühasibat uçotu haqqında” Azərbaycan Respublikası Qanununda edilən dəyişikliklər vurğulanmalıdır. Dəyişikliklərə əsasən ölkəmizdə mühasibat uçotu subyektləri tərəfindən müvafiq olaraq beynəlxalq uçot standartları tətbiq edilməlidir. Ölkəmizdə mövcud qanunvericilik dövlət sektoru üzrə maliyyə auditinin aparılmasında və nəticələrinin verilməsində ayrı-ayrı qurumların maliyyə hesabatlarının yoxlanılması təcrübəsini labüd edir. Bu şərtlər nəzərə alınmaqla, 2021-2025-ci illər üzrə Strateji İnkişaf Planımızda maliyyə auditinin əhatə dairəsinin artırılması və keyfiyyətinin yüksəldilməsi ilə bağlı aralıq nəticə nəzərdə tutulub. Hədəflərə çatmaq uğrunda başlanılan yolda 2 ildə bir sıra əhəmiyyətli işlərin görülməsinə nail olunub. Bura beynəlxalq standartlara əsaslanan Maliyyə audit üzrə təlimatın hazırlanması, il ərzində keçirilən maliyyə auditlərinin sayının artması, maliyyə auditində risk əsaslı və nəzarətyönümlü audit yanaşmalarının tətbiqi, kadr potensialının gücləndirilməsində peşəkar sertifikatlaşmaya diqqətin verilməsi və digər tədbirlər aiddir”, - deyə auditor vurğulayıb.
Tədbirdə Birləşmiş Ərəb Əmirliklərinin, Avstriyanın, ABŞ-ın və digər ölkələrin nümayəndələri INTOSAI səviyyəsində əldə edilmiş son nailiyyətlərdən danışıblar.
Qeyd edək ki, sentyabrın 1-dək davam edəcək tədbirdə ali audit orqanlarının beynəlxalq standartlarında edilmiş dəyişikliklərdən, həmçinin üzv ali audit orqanların maliyyə auditi sahəsindəki təcrübələrindən, tətbiq edilən audit metodologiyaları ilə əlaqədar qarşıya çıxan çətinliklərdən bəhs olunur.
Bölmənin digər xəbərləri
